熱門:

2020年4月27日 港股直擊 即巿股評

【輪證贏家】上望保歷加通道頂目標不變

今日返咗嚟公司一趟,仍然都係搵個人睇吓都無;唔緊要,反正啲嘢都係咁樣做架啦,但都係嗰句:坐得舒服好多,兩個17吋芒點都開心過屋企部11吋Mac嘅。

今朝早出門口前見到日經升逾300點,今朝恒指都不遑多讓,依家9點49分,開晒電視、電腦之後,我發現放喺電視機旁盒紙巾得番個盒,仲要成個紙巾盒掉轉咗,哈!公司張檯我有強迫症架嘛,啲嘢放喺邊我點會唔知;又邊鬼個咁神心返嚟拎晒我成盒紙巾去用,明明我隔離位仲有一大盒開住咗喺度。

望望電視,恒指升幅擴大至升逾400點,截至9點57分止,最高見過24241點。日線圖上恒指再次重返10天線(24099點)水平之上;留心少少,見日線圖上SlowSTC(14,3)兩線目前回落至中軸水平,而%K線於中軸水平升穿%D線,雖然呢一下未必係好有力嘅升穿,但都係一個指標嚟嘅。

觀乎上個星期恒指悶局,於是上個星期五(4月24日)揀咗隻恒指界(47982),諗住用個上限價同下限價包住恒指,唔駛被悶市吽死;同時以保歷加通道頂部(24690點)為目標,所以先揀中間位為24500點嘅(47982)。今日見(47982)嘅證價同上個星期都係一樣,Well,界內證真係少人玩。

少人還少人,如果恒指升勢持續,仲可以keep得住好似之前嗰兩個浪,繼續以一浪高於一浪嘅形態上行嘅話,(47982)都應該有望可以再上。

再睇埋牛熊證,頭先mark出嚟嘅高位24241點已經將熊證首兩層街貨24000至24099點,同埋24100至24199點嘅街貨全數收回,呢度有相當於324張期指。而目前最貼價熊證為24200至24299點,雖然呢度只有相當於34張期指,但如果再上多100點,即24300至24399點呢度,就有成524張期指企喺度。當然啦,呢堆街貨同恒指現價相差都只係百零點,相信會有唔少人選擇棄權,但同樣地亦可能有唔少資金見今日恒指發力,反手開淡倉博掉頭,且可能會選擇用一隻貼價嘅輪證嚟做trade,目的係以高槓桿一下博掉頭成功,然後就可以收隊。

唔係話呢個情況唔會發生,不過見牛證街貨最貼價為23700至23799點,呢度得相當於42張期指,再落多100點,即23600至23699點都係得50張期指,換言之暫時未見有咩理由似係將恒指由處於熊證街貨區一下子扯落去無乜街貨嘅牛證區度。

既然今日恒指稍為有一個有明確少少嘅方向,又反正隻(47982)未開得齋,恒指牛(61232),收回價23468點,同現價有逾700點差距,相同收回價牛證中槓桿最高且成交活躍,手痕可吼恒指5分鐘圖見超賣時小注落場。

BTW,今日【輪證下半Part】暫停一日,同事話人少少都要同我食餐生日飯囉(正日唔係今日,喺聽日),多謝你哋呀!

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads