熱門:

2020年4月8日 即巿股評 港股直擊

【盤房來料】大市長假前二萬四水平爭持

隔晚美股臨尾香,早段道指一度升逾900點,但至尾段掉頭向下,蒸發全部升幅,最終三大指數倒跌收場。其實美股周一勁升得有啲無厘頭,明明武漢肺炎疫情仍未受控,全球確診人數已突破142萬,歐洲國家死亡人數更直線上升,法國更警告疫情最壞時間仍未出現。華爾街班友仔又覺得好似覺得疫情仍然嚴重,嚇到美股當堂腳軟。

港股ADR及夜期亦跟跌,今早恒指低開61點,開市價24191點已經係半日高位,開市後跌幅隨即擴大,一度跌268點,見過半日低位23984點。其後一直喺24000關爭持,中午恒指報收24013點,跌239點;國指中午報收9718點,跌128點。

藍籌股普遍受壓,友邦(01299)跌逾1%,反而大笨象(00005)逆市升0.4%,暫時叫做上番40元企穩,之前血肉長城守住40元嗰班忠粉,總算無白費心機。不過講真嚟緊一段日子,銀行面對息差收窄,以及債仔賴債及資產質素變差,經營環境惡劣下,唔會有好日子過,諗住長坐銀行股收息已不合時宜,唔單止要捱價,面對資本減息風險,連息都冇得收真係喊得一句句。

騰訊(00700)CEO劉熾平減持60萬股騰訊,雖然相對其幾千萬股持股量係濕濕碎,不過對於市場嚟講,梗係一個負面訊息。其他科網股個別發展,重磅嘅阿里巴巴(09988)跟美團(03690)回軟。阿里噚日傳過軟庫試盤批股,但最終因為市場反應一般已call off,雖然阿Man仍然睇好阿里中長線發展,但軟庫手上持股未知幾時失驚無神要減持,為阿里巴巴添上不明朗因素。

平安好醫生(01833)高處未算高,中午升3.5%再升上市新高,集團早前打通湖忠省醫保支付,相信未來將打通更多省市醫保支付。同類嘅阿里健康(00241)相對落後,但從12元樓下低位亦反彈唔少,呢隻同樣前景一片光明,值得逢回吐吸納。物管股個別發展,中海物業(02669)五連升,今早再創新高,其他物管股亦見資金追捧。阿Man一直強調大市若然反彈,肯定係新經濟股跟輕資產股彈得最快,目前相關股份表現亦引證阿Man睇法。

至於大市彈咗兩日,上到嚟24000水平,開始抖抖亦正常,加上明日之後就係復活節長假,始終長假期前資將會較為審慎,今明兩日大市表現難免漉咗啲,如果之前有貨嘅,只要手上持貨未走樣,可以再坐一會,未有貨喺手嘅,睇多兩日假期後先入市亦遲。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads