熱門:

2020年4月3日 港股直擊 即巿股評

【輪證贏家】恒指低開拗腰速度快咗

噚日恒指低開後5分鐘圖見拗腰回升,喺大約11點30分至上半場完結前,SlowSTC(14,3)已經踩入咗90以上嘅嚴重超買範圍,呢個時侯將昨日朝早揀嘅恒指熊(62533)放落場就真係靚仔,按呢段時間(62533)高低位做過$0.073/$0.057,平均買入價為$0.065。

一個鐘中場休息之後,下半場開市,5分鐘SlowSTC(14,3)已經見承接上半場超買回落,大約1點20分至1點35分,SlowSTC(14,3)兩線已經落到1X呢啲位,呢個時侯(62533)高低位$0.08/$0.067,平均賣出價$0.0735,對比平均買入價$0.065,賺幅為13.1%,亦完成day trade。

噚晚美股造好,應該都係因為油產傾掂數;不過今朝恒指開市就要跌逾200點,幸好仲咬住23000點。到依家9點46分,恒指都仲係跌過200點,而呢期焦點滙控(00005)依家有2.3%跌幅,做緊$38.05;同樣都係唔派息嘅渣打(02888)就跌3.1%,報$38.55。

日線圖上恒指今日咁啱踩正條10天線(23099點)。五條平均線由3月17日開始至今都係倒序排列,當中條10天線就由周二(3月31日)開始見回升,依家見同條20天線(23407點)相差308點,日線圖上見突破或者仲係言之尚早。

開埋恒指牛熊證街貨圖睇,熊證區再有兩層新增街貨,最貼價層為23300至23399點;至於牛證街貨最貼價層仍然係22700至22799點。中間位為(23300+22799)/2=23049.5點,怪不得開局恒指悶咗咁鬼耐啦,原來企咗喺中間位。

依家9點56分,恒指跌幅有所收窄,至跌150點,報23129點。雖然計上去呢個位係傾向熊證街貨層,但說實話以貼價街貨層嘅街貨量嚟計,牛證嘅貨量點都比熊證多,就以頭五層計,牛證平均每層都有百零二百張期指,但熊證得幾十張期指,最多嗰層都只係得141張期指,唔通個市係想做到個樣跌幅收窄,引多啲即市資金入貼價牛度,然後先嚟行動?

希望只係我諗多咗;暫無頭緒,又見月曆今日係星期五,用返噚日嗰朝用恒指5分鐘圖見SlowSTC(14,3)上到超買出淡倉唔係唔得,只不過今日恒指拗腰速度比噚日快咗好多,「阿婆行得快,一定有古怪」,今日都係做觀眾算啦。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads