話說我有位舊同事「燈神」,即係之前話買人仔、買澳紙,仲計劃買英鎊嗰位,結果早排啲滙全數攬炒。跟手佢見油價回升時就Put隻中國海洋石油(00883)(撻全朵係有原因,睇埋落去就會明),隻Put仲係我幫佢揀,好啦,賺到啦,又心思思想去反手Call返隻883,然後有一日佢同我講入咗隻(14621),咁當然我無理到啦,錢又唔係我嘅。但過咗一陣佢先發現原來(14621)嘅underlying係中國海外(00688)。須知道係輪證上,883嘅簡寫係「海油」,而688嘅簡寫係「中海」,但883全名為「中國海洋石油」,又有「中」,又有「海」,當下嗰刻都真係得啖笑,好彩呢兩日個市生性,佢先至倍感安慰。
我只能夠話佢係「傻人有傻福」,咁當然啦,有時我哋落場嘅都會發覺「運氣」係會增加勝算,畢竟喺股市上係無必勝方法。就好似噚日咁,諗住跟市升上去,trade隻恒指牛(60628)。過咗一個朝早,恒指5分鐘圖上SlowSTC(14,3)回極都係2X呢啲位,(60628)繼續收喺籠底。至咗下晝大約1點30分到,恒指發力再升過,well,這些機會不是我的。
依家9點38分,恒指開咗市,開市報23604點,先將第一層熊證街貨23500至23599點收檔,呢度就只有7張期指街貨啫。開後恒指跌幅有所擴大,暫見跌248點,做緊23279點,日線圖上見今日粒燭同噚日個水平差唔多。
SlowSTC(14,3)上升勢頭暫時仲見到,而MACD雖然仲處於熊區,但「牛差距」出現咗;而14RSI勢頭就有啲向下,DMI就同噚日一樣。總括而言:好壞參半。
睇返牛熊證街貨圖先。頭先講咗熊證第一層開市時已被打靶,換言之依家最貼價嘅係23600至23699點,呢度有相當於128張期指;至於牛證最貼價層追升至23000至23099點,而呢度就只得4張期指街貨。
事實上,牛熊兩邊街貨,如果講近嘅話就真係唔多,講緊一係要落到22000點樓下,或者24000點以上,中間呢個遺千點嘅Gap位,只能估計係市場對於幾百至過千點嘅波幅習慣咗,所以先至擘到嗰重貨區重咁鬼闊。
如果按目前牛熊證街貨分布,熊證嗰兩層過百張期指點都比牛證得100張都無嘅街貨層為吸引;再者,熊證最多新增街貨區域只係第五層街貨位,呢度有相當於263張期指(可想而知啲街貨真係少得可憐)。
街貨少又點?班友仔都要開飯架,恒指牛(61363),收回價23028點,全城第二貼價牛,同現價有逾570點差距,槓桿最高,同噚日策略一樣,吼5分鐘圖見超賣落場,更重要嘅係:唔買唔使死。(Underlying無錯架啦,放心啦)
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家