熱門:

2020年3月25日 港股直擊 即巿股評

【輪證贏家】恒指牛day trade試試佢

早晨,港股啱啱完咗個U盤,開報23225點,升592點。今日嘅升幅怕且都係承噚晚美股大升逾2,000點;而美股嘅大升都幾肯定係承周二(3月24日)亞股嘅升勢,睇落去好似正常,但只不過係噚晚無乜特別事發生,純綷接住落咁解。

先睇牛熊證街貨圖,噚日都有計過恒指由一直靠近牛證街貨,至大升後嘅今日,港股推一步推高後,久違了嘅熊證被打靶終於都出現。熊證首三層街貨全數被收回,呢三層夾埋有1318張期指,而熊證最貼價層亦上移至23200至23299點,呢度有相當於342張期指。

依家9點33分,恒指正式開市,升幅進一步擴大至逾700點,最高暫見23423點,換言之,熊證又有多兩被收回,呢兩層夾埋有372張期指,連同開市無仇報嗰堆,暫時總數係1690張期指。而最貼價熊證就再上移至23400至23499點,呢度就只有28張期指,講緊要上到去24200至24299點呢度,街貨相當於期指張數先至再有三位數出現。

至於下方牛證,今日見有唔少新增街貨層出現,而最貼價嘅已經追上至22300至22399點。本來牛熊兩邊最貼價街貨層受新增牛證街貨影響而有所收窄,但無計,恒指今日向上爆,牛熊街貨差距又拉遠咗。

再睇埋日線圖,呢兩個交易日恒指都用裂口彈升,今日收復埋條10天線(22921點),技術上算叫做升破咗條「下降軌」,SlowSTC(14,3)、14RSI同MACD都有勢頭向上、轉好跡象,但就係怕條DMI,雖然+DI同-DI嘅差距努力地收窄中,不過反映力度嘅ADX就掉頭向下,唔通係想暗示升市力度不足?

噚日喺[下半part]講過讀者阿仁問嘅阿里巴巴(09988),睇返日線圖見噚日同前日(23日)低位分別為$170同$170.2,嚴格嚟講都算係一個「平底」,今日隨市彈,叫做上返條10天線($179.71)同有見過$180以上,但已經呈高開低收。轉5分鐘圖睇SlowSTC(14,3)同恒指一樣,依家(9點49分)已經上到超買水平且有準備回落嘅走勢。

唔理追恒指升又好、阿里升又好,似乎依家呢個唔係一個靚位,想做day trade嘅都係吼SlowSTC(14,3)落返超賣穩陣啲。

開牛熊證搜尋器見到今日最貼價嘅牛證,收回價再進一步上到23228點,同現價有約200點差距,喺仲未穩定嘅市場上用隻咁貼嘅證,快手極都有啲冒險;恒指牛(60628),收回價22648點,同現價有逾700點距離,換股比率10000,槓桿比率約19.02倍屬偏高水平,真係Day trdae好啦,鬼知今晚美股又會發咩神經先得架。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads