熱門:

2019年11月21日 港股直擊 即巿股評

【輪證贏家】準備反手唷

噚日終於都頂唔順走咗去睇醫生,最正嘅係喺診所見到隔離team同事,佢比我更早落去睇醫生(正確嚟講係未開門佢就喺出面排隊),到我睇完之後等攞藥,好不幸地遇上診所電腦死機,喺姑娘對唔到藥嘅情況之下,要等佢電腦好返我先至攞到藥,姑娘仲話配到就打返電話比我添。兩個鐘頭之後我終於忍唔住打返去診所,姑娘有啲如夢初醒:「呀!黎小姐,你啲藥有啦!」我都忍唔住答返佢一句:「真係唔該晒。」

食完藥頂到收市之後就瞓,諗住一如以往news team同事見到有事找我而佢哋可以幫到我手嘅話,見我喺電話無反應就會出手,誰不知無...最後仲要出動到台長嚟搵我...唉...算啦,轉天氣真係要留返啖氣暖肚。

今日如常落街等巴士,結果等咗大半個鐘先至上到車,喺等車同巴士上先後出咗兩個push,好明顯都係講緊恒指大跌啦。依家10點14分,返到嚟公司開晒所有電腦、電視,斟定杯水之後就見到恒指似乎暫時喺跌500點附近呢啲位度停咗一停,再睇返日線圖就見到恒指今日裂口下跌,又再次處於五條平均線以下水平,將早幾日好友嘅歡欣全數消除。

睇埋恒指牛熊證街貨圖,依家10點22分,恒指做緊26465點,跌424點,最低做過26306點,以呢個低位點數計,牛證首四層街貨,由26700至26799點起步,至26400至26499點呢四層全數死亡,最貼價變相係26300至26399點,不過呢度其實都同死晒無乜分別,所以可以直接將26200至26299點呢度視為最貼價牛證,而呢度有相當於722張期指,再落多兩層,即係21600至26199點,同埋26000至26099點,分別有498張同557張期指。嘿...咁近又咁重貨,點能夠可以全身而退呀。

恒指熊(60002),收回價27008點,同現價有近600點差距,唔敢揀咁貼係怕個市忽然反手,而(60002)係收回價27000點附近水平中最高槓桿嘅一隻熊,吼恒指5分鐘圖見上到去超買水平時,可小注落場。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads