隔晚美股偏軟,但喺大部份美企業績表現向好之際,美股回吐壓力有限,只有納指跌得較多。不過國際貨幣基金組織(IMF)突降今明兩年亞洲增長預測,搞到港股吽咗兩日之後,今日走軟,半日回吐近三百點。恒指低開14點,半日反覆向下,雖然一度倒升32點,見過26818點半日高位。其後沽壓增加,跌幅擴大至294點,見過26491點半日低位,曾穿10日線(約26533)。中午恒指報收26535點,跌251點;國指跌84點,報收10442點,暫時大市險守10日線。
藍籌股大部份向下,瑞聲(02018)半日跌3.7%,藍籌之中跑第尾,同類嘅舜宇(02382)亦跌1.7%。騰訊(00700)跌近2%,又逼近320元近日支持位,加埋友邦(01299)跌1.2%,同埋中移動(00941)亦跌1.3%,三大巨頭已拖低恒指95點。工行(01398)逆市升0.4%,成為恒指成份股冧巴溫。
內地有消息指計劃修改未成年人保護法,以加強管制網路遊戲時間,受呢個消息拖累,手遊股全線仆值,除咗龍頭騰訊跌近2%之外,其他手遊股普遍跌1%以上,而百奧(02100)跌幅更達5.3%。
除咗手遊股跌到一仆一碌,內需股沽壓亦沉重,可能之前升得勁嘅關係,資金一撤退,沽貨亦沽得較狠勁。華潤啤酒(00291)跌3%,其他啤酒股亦下跌。食品股普遍亦錄得超過2%跌幅;體品股兩大龍頭安踏(02020)及李寧(02331)跌逾2%。
噚日財爺波叔公布第三輪紓困措施,主要向零售業及物流業施恩,零售股反彈。不過政府只不過撥出約廿億,補貼物流業佔大多數,至於減免租金優惠,並唔涉及私人業主旗下嘅物業,零售業係咪真正受惠,阿Man有所保留,零售股呢下反彈,都只係之前跌得過殘,呢吓死貓彈亦救唔得番幾多,零售股已步入寒冬,暫時都係不宜沾手。
港股暫時險守10日線,之前兩日唔上唔落,但唔代表由弱轉強,家下港股仍然受制於由4月高位引伸落嚟嘅下降軌,一日港股未能重上27000點並企穩,暫時都只係喺下降軌內運行。短線恒指喺26200至26900之間區間移動,向上或向下都未能見重大突破。
麥狄文
(徐狄怡‧證監會持牌人)