熱門:

2019年6月24日 港股直擊 即巿股評

【盤房來料】物管股高處未算高續跑贏大市

全世界焦點都係今個星期G20峰會,中美元首會面,市場憧憬中美貿易談判唔單止可以重啟,仲會有良好進展,可以好快搞掂。港股上周已顯著反彈逾千點,今早表現較為反覆,先低後高後升幅收窄,但仍保持升勢。

恒指今早低開73點,一度跌115點至28358點半日低位,其後回升最多160點,高見28634點創個半月高位,其後升幅收窄。半日恒指報收28538點,升64點;國指則報10959點,升37點。

藍籌股個別發展,阿Man一直睇好嘅醫藥股,今日見中生製藥(01177)跑出,呢隻同時係眾多醫藥股中阿Man至愛,半日升近4%,走勢回勇,已成功收復所有移動平均線,重返4月份高位指日可待。中生制藥係半日升得最多嘅藍籌,相反跌得最多嘅藍籌股係萬洲(00288),半日趺4.1%。其他重磅股升幅有限,普遍不足1%,騰訊(00700)、建行(00939)、工行(01398)、友邦(01299)等升0.3至0.5%。

人民幣靠穩,阿Man上周已提過內房股及物管股可吼,內房股中又以大灣區概念嘅做得特別好,廣東省財政廳公布大灣區人才政策,市場憧憬大灣區住屋需求上升,相關內房股跑出,普遍錄得1%以上升幅。

不過內房股好都唔及物管股勁,所以阿Man一向都係傾向揀物管股而少揀內房股。整個板塊升勢強勁,愈升愈有閒閒地都錄得2%以上升幅。碧桂園服務(06098)及阿Man之前特別推介嘅佳兆業物業(02168)齊創新高,後者半日更錄得超過半成升幅。有貨當然坐定定,無貨就吼位逢回吐吸納,呢個板塊講咗N咁多次,今年一定跑贏大市。

有沽空機構向羽絨股波司登(03998)開火,指其股份一文不值,股價跌近25%後中途拉閘。波司登係咪衰到一文一不值阿Man唔敢講,但家下三十幾度,羽絨股肯定唔係當炒嘅時候。

內需股中今日輪到體品股發力,安踏(02020)之前都曾經被沽空機構狙擊,但結果不了了之,股價表現亦證明公司真金不怕洪爐火,半日升近6%,報收55元,話咁快又再逼近之前60元高位。其他體品股當然無安踏咁厲害,所以買任何一個板塊都好,幾時都係揀咗龍頭先。

上星期推介嘅半新股東方教育(00667)今日終於開車,半日最高見11.1重返之高位,目標仍然係12.5元,止蝕位10.3元不變,反正此股估值相對便宜,加上其市值超過200億元有番咁上下份量,未來有機會加入深港通,值得坐定定等收成。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads