豬年首個交易日，先祝大家喺魚缸豬事大吉，買乜升乜，豬籠入水；家庭方面就豚豚圓圓，家肥屋潤。隔晚美股腳仔軟，皆因美國講到明喺3月1日，即係中美貿易戰談判期結束死線前，「侵侵」同「習大大」都唔會見面，更表示雙方要達成真正協議，道路仍漫長。市場擔心中美貿易談判有阻滯，加上歐洲下調今明兩年經濟增長預測，再度勾起市場對歐美政經狀況嘅憂慮。
豬年首個交易日，港股裂口低開282點，其後跌幅擴大至456點，見27534點半日低位，不過穿一穿條10日線(27601)點，呢條線見支持，跌幅顯著收窄，27800關失而復得，最終半日恒指跌135點，報收27854點；國指則跌112點，報收10923點。
重磅股跟大市一樣，跌幅收窄，當中友邦(01299)更逆市升近2%，支撐大市重上二萬八關，而一樣手機設備股蘋果孖寶走強，瑞聲(02018)及舜宇(02382)齊齊升逾2%。中資金融股表現較疲弱，跌幅普遍超過1%。
話咗5G概念股一定係今年重點，果然今日呢個板塊仍能逆市向上，之前炒得火熱嘅中國鐵塔(00788)，上市半年禁售期過去，超過88億股解禁，早段股價怕怕插水2.5%，不過股價上得番1.6元靠穩，半日價倒升3%，大有機會調整完成再展升浪。其他5G概念股亦有資金追捧，京信通信(02342)跟中通服(00552)分別升6.1%及3.7%。
其實除咗5G概念股之外，阿Man今年仲包括家電股，首選龍頭海信(00921)同海爾(01169)；次選係TCL電子(01070)同創維數碼(00751)，呢個板塊同樣係可以逢低吸納。中資金融股受惠阿爺放水，亦值得睇高一線，而當中又以內地券商股最受惠。
眼見今年港股低開後，能夠低位抽番二百幾三百點上去，成功收復27800水平，睇嚟今個月港股都未必喺1月份勁升後轉勢回吐，大有機會先整固後更上一層樓。恒指支持位喺27400水平，估計大市或先喺27400至28000點之間整固，待中美貿易談判帶嚟好消息的話，再突破二萬八向上挑戰28200至28400阻力位。總之暫時都咪睇得太淡，尤其下星期北水回歸，多咗北水呢枝水喉，港股再向上挑戰亦有可能。留意牛熊證街貨分布，暫時都係熊證街貨較多，除非牛證街貨大增，短線港股急轉直下機會唔大。
麥狄文
(徐狄怡 ‧ 證監會持牌人‧ 大錦證券有限公司董事)
