熱門:

2019年1月23日 港股直擊 即巿股評

【輪證贏家】恒指Call頂硬上

喺未睇個市之前,我好想同大家分享一件我噚晚發生嘅事,然後你哋應該會醒覺「阿珊係一個:A(好聽啲嘅)蠢貨;B(不供詞填充):戇_」。事緣噚晚喺屋企食飽飯之後慢慢嘆我啲車厘子啦,大家有食過車厘子嘅話都知道中間粒核通常都會黐住少少車子厘啲肉架嘛,慳家嘅我就梗係會慢慢食/吮/啜埋圍住粒核嘅肉啦,食到第二粒嘅時候,我唔知做乜(可能放緊空掛),當我食/吮/啜埋圍住粒核嘅車厘子肉之後,我吞埋粒核落肚(哈哈哈)嗱,留意番,吞嗰吓同吞完之後我諗10秒到啦,我自己都未覺得有咩問題,10秒過後我個人開始醒覺,主要原因係有啲嘢梗住我個心口(應該係粒核掛,哈哈哈),然後我WhatsApp我老媽同佢講返件事,雖然佢WhatsApp回覆我兩個字:傻瓜;但我極度有理由相信佢心入面真正個答案係B!

好!正經嘢講完,又睇返啲無謂嘢先(係呀,玩先係我強項,我成日被友欄杜比話我係九型人格嘅7號仔:享樂型)今朝起身我都唔係掛住粒車厘子核如何,反而急住開電視睇吓噚日外圍發生咩事,電視話喎,因為華為單嘢所以美股又有啲風浪湧現,本來跌400幾點,之後收窄返啲,跌300零收工;而見今朝日經都跌100點鬆啲,見到咁嘅情況都預咗,事關噚日喺[下半part]都打定輸數,所以先至話「完美演繹咩叫做左一巴、右一巴」。

可能噚日下半場恒指對華為單嘢「已經作出反應」,所以今朝早恒指開市跌125點之後,依家9點58分,恒指跌轉升91點,做緊27097點,隻恒指Call(11718)依家輪價做緊$0.031,對比起買入價都只係爭一格半格。

開埋恒指牛熊證街貨圖睇,下方牛證貼價度雖然向前推進咗兩層(即由噚日嘅最貼價嘅26600至26699點,變成今日最貼價係26800至26899點),不過,上方熊證27300至27399點呢度儲到成1091張期指,連同打後兩層都有過千張喎 ,按現價計只要恒指繼續努力反彈多300點something就可以食到total 4119張期指;又適逢距離辛亥年(即係豬年呀)仲有八個交易日,下個星期三(1月30日)就期結啦,反正依家粒燭被條150天線(27007點)同10天線(26827點)夾住,(11718)揸住先,若然失咗條10天線就扯白旗。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads