誠如噚日所講，一早落咗場嘅恒指熊(69746)喺2點幾就嚟3點到，恒指5分鐘圖見SlowSTC(14,3)剷到上超買水平，反正仲有個零鐘先收市，就比多少少耐性啦，誰不知戰友Jack whatsapp我話「原來依家(成交)先得500億......」，望一望個website頂頭恒指隔離再隔離粒數，係喎...窮到咁嘅(確實係完完全全忘記咗成交日縮呢件事)，於是個人就開始心急想將隻(69746)掉走，一等就等到就嚟收市咁滯，睇圖仲見到3點5分時5分鐘圖上嘅SlowSTC(14,3)%K線同%D線兩線上到「9」字頭，當時恒指做緊25846點；而喺3點45分，恒指都仲做緊258232點呢啲位，但同時嘅5分鐘圖上嘅SlowSTC(14,3)就落到去中軸水平。
咁就麻煩啦，呢啲位回落到中軸嚟講，即係話萬一之後SlowSTC(14,3)上返去超買水平嘅話，一定會高過258XX點呢個位啦，情況就好似快餐加價咁，年頭話你知A餐賣$30，年中同你講A餐做特價，盛惠$29.5，心水清嘅何止心裡面妖出嚟，直頭妖到上把口再開埋出嚟添；去到年底/翌年年頭，佢又會同你講「百物騰貴」呀，然後一加就加到上$35一個餐。比著係你，你會點做？「唔幫襯佢囉，去幫襯啲細鋪/小商戶囉。」係囉，唔幫襯佢 ，唔要佢 。而(69746)=A餐餐廳 > 掉得。
「若然仲有熊證/Put喺手咁點呀？」還記得之前用過「跑步」同恒指剛開市後嘅情況做比喻嗎？跑完步唔會可以話停就停，點都會向前跑多幾步先至停，目的係要將個人嘅速度慢慢減慢，咁個人先可以停落嚟，由跑變行；恒指裂口高/低開後會按住升/跌嘅方向再跑多幾步，因為剛開市總會有錢接力追，但追到咁上下(唔會好耐，因為本身裂口出現嘅同時，下方技術指標都會同時跟超買/超賣)，當技術指標上/落到再無路行嘅時候，按鐘擺理論就要向相反嘅方向行，依家10點16分，拆恒指5分鐘圖你就會見到依家恒指生咗個「圓頂」出嚟。要止蝕就更係盡量搵一個可以蝕少得一格得一格嘅位啦，你懂的。
至於隻滙控(00005)，身邊有唔少人二話不說就將隻滙豐Call(15093)(或者佢哋揀其他Call/牛證)推落場，而我就拖到[下半part]都出埋街都仲未落場。若然噚日一早落咗場嘅，按(15093)噚日高低位做過$0.19/$0.18拉個中間位$0.185作為買入價計，依家10點23分，(15093)高低位暫時分別做過$0.213/$0.192，拉個平均數$0.2025計，即係話平均賺幅有9.5%。
9.5%賺幅夠唔夠？咁就視乎你個pool有幾大同你有幾貪心啦；但可以肯定嘅係呢9.5%可以幫補/買到一份聖誕禮物比自己，獎勵下自己；想買多想送比人？如果我話比你知日線圖見滙控SlowSTC(14,3)%K線今日確認低位升穿條%D線，咁你會點做？滙豐Call(14438)，行使價$67，約4%價外，槓桿偏高、引伸偏低、街貨少、成交活躍，仲想點？
仲有接近兩個星期就聖誕節，預祝大家聖誕快樂！(起樂)「噢~聖誕節托它歸家...我阿媽話幾貴架；噢~聖誕節托它歸家...放喺廳度閃閃吓...」我屋企無咁大地方，呢棵樹喺公司樓下影嘅。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
