早晨！(好似咁耐以嚟都未試過喺呢度同大家講早晨)，依家10點1分，喺呢半個鐘頭內恒指由跌轉升再轉跌，兜兜轉轉結果依家報25718點，跌33點，噚日揀好嘅恒指熊(69746)，按噚日朝早11點45分至上半場完結前，同埋下晝2點10分至25分，恒指5分鐘圖上見SlowSTC(14,3)都出現超買，呢兩個時段(69746)高位分別做過$0.100/$0.098同$0.098/$0.094，平均數$0.099同$0.096作為買入價計，依家10點6分做緊$0.096，最高曾做過$0.105，就算呢段時間恒指5分鐘圖SlowSTC(14,3)無出現超賣，可能有唔少人計一計數有得賺就都選擇收割。
當然啦，如果嚴守買賣策略嘅話，SlowSTC(14,3)未見超賣亦唔會沽貨住，更何況恒指現水平同目標(保歷加通道底(25382點))都唔係爭好遠。睇番去日線圖睇，恒指仍處於保歷加下降通道，SlowSTC(14,3)兩線開始踩入超賣範圍。望多眼恒指牛熊證街貨圖，嘩！最貼價嗰兩個100點範圍，即25500至25599點同埋25400至25499點，呢兩part各有過千張期指駐守；再間多三行，數到落25000至25099點呢度，又有過千張期指進場。大家還記得早排喺26000至26099點嗎？當時同依家一樣，都係喺整點大關口放重兵，最後個結果係點？你知架；兩組重貨出現反映市場兩班人心態，上個星期都係[下半part]講過點解。而我想講嘅係：乜依家呢個樣咁似上個星期出現過嘅樣嘅？(69746)仲喺手嘅可以繼續留意今日有無走貨位；今朝一早走咗而又想再追跌嘅話，可以重新揀過一隻熊仔/Put輪，一如以往要等靚位(分鐘圖見超買)先至好入，記注，呢一注你入唔到唔緊要，反正已經執左一轉。
繼續講返隻滙控(00005)，噚日就揀定隻滙豐Call(15093)出嚟，但仍堅持日線圖SlowSTC(14,3)兩線一日未一齊超賣，就一日唔落場。今日再睇，滙控股價已大半個身跌出保歷加通道底以外範圍，SlowSTC(14,3)嘅%K線同%D線跌到落嚴重超賣水平，可以開5分鐘圖吼超賣位將(15093)落鑊炒啦。
「手揸恒指熊但又Call滙豐？」恒指依家見紅但港交所(00388)同騰訊(00700)夠升囉，關咩事；不過令我諗起一句好old school嘅嘢，你望返條大題就知架啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
