熱門:

2018年12月6日 港股直擊 即巿股評

【盤房來料】港股50日線或有支持

以為中美貿易戰開口叫暫停,雙方訂下90日談判期,諗住港股唔再大升,都可以企定定喺幾條移動平均線之上,誰知美國國債孳息曲線倒掛,拖累美股走弱嘅同時,又爆多單華為CFO孟晚舟喺加拿大被捕,涉嫌違返美國對伊朗實施制裁,被美國要求引渡至美國審訊。上半年嘅中興(00763)事件已搞到雞毛鴨血,今次華為又唔知會搞成點,缸邊友見過鬼怕黑,當然沽之而後快。

口痕友話美國表面同中國修好,侵侵又同習大大拍晒膞頭扮老友,轉過頭就捉咗華為CEO,挾持中國最大手機生產商做人質,表裏不一,面嗰浸就話坐低慢慢傾,底嗰浸擺明係要脅,逼令中國投降投誠。呢個消息一爆出,中港兩地股市率先齊齊跪低,不過美股亦唔好得去邊,本來喺隔晚休市前,美股已顯著下跌,華為事件拖累科技股捱沽,道指期貨家下再跌逾300點,道指25000支持位不堪一擊。

至於港股噚日失守100日線後已響起警號,今日接連出多一個下跌裂口,仲要低開低走,走勢明顯轉弱。恒指裂口低開470點,即失10日線(26565),其後跌幅雖曾略為收窄至438點,見26381點半日高位。以為20日線(26241)會有支持,誰知轉個頭連20日線(26241)都失守,最多跌771點,低見26047點,穿一穿條50線(26086)點見支持。恒指半日報收26117點,跌702點,國指則跌304點,報收10452點。

華為事件令科技股成為重災區,舜宇(02382)一向為華為手機鏡頭主要供應商,半日重挫6.2%;瑞聲(02018)亦跌6%,而主要客戶為華為嘅中國軟件(00354)半日更大跌11.7%,其他科技股普遍跌超過2%,暫時喺華為事件未明朗化前,科技股呢期都係少沾手為妙。

至於大市整體表現明顯轉弱,失守多條平均線後,好友喺二萬六關,亦即50日線或會守一守,失守有機會再回落至25500水平,不過25800水平料有不俗支持。阿Man認為大市仍然喺區間內移動,若然因為一單華為事件,大市就話要跌穿10月底部似乎講唔通,皆因消息主導,一個屈尾十又話放過華為,氣氛隨時又逆轉。暫時大市將會喺25800至26800之間上落,家下由本月高位27300回咗落嚟,已經跌咗千三點,呢個時候再追淡真係要諗過。之前都講過追升殺跌無意思,即係之前講過27300點阻力唔細,嗰個位再追好倉值博率已低,同樣道理,總之短線見26000水平有支持,無謂再追淡。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads