等到頸都長,卒之等到G20峰會結束,「侵侵」跟習大大一餐晚飯,又拍晒膞頭話老友,中美雙方同意暫時休戰,貿易戰雖未結束,但唔再升級,至少有90日談判期,喺下月1月起,美國唔再向中國加碼徵收關稅,雙方繼續談判,務求喺90日內達成協議。雖然中美雙方談判能否喺90日線有美滿結果仍屬未知數,但至少有一段時間緩衝,環球股市總算喺今年最後一個月可以乘機做番好啲,借貿易戰小休而粉飾櫥窗。
道指期貨勁升,亞太區股市做好,恒指今早裂口高開678點,開市後升幅曾收窄至500點,見過27007點半日低位,喺100日線(27001)點似乎有唔錯支持。其後大市再發力,加上有成交額半日增至767億配合升勢,A股亦有理想表現,恒指中午報收27217點,升710點;國指則升302點,報收10923點。
指數權重股除咗中移動(00941)逆市跌逾1%,其他重磅股表現做好,騰訊(00700)半場一度升逾5%,見328.2元,半日升4.2%,報325元。騰訊上星期阻力位喺320元,今日成功升越兼企穩,320元將由阻力變為支持,只要騰訊穩守320元及100日線(322元),騰訊短線維持強勢,就算唔想再做好,都咪多手去做淡。而騰訊下一目標會係8月份下跌裂口低部341元,350元阻力唔細,要突破唔係咁容易。
至於其他重磅股,阿Man一直好大笨象(00005)同友邦(01299),兩者均交出一份亮麗成績表,短線大笨象目標喺70元,友邦短線67.5元會遇阻力。其他中資金融股亦表現唔錯,阿爺一直出手維穩,中資金融股短線睇高一線。俄羅斯話有意跟OPEC齊齊減產,油價就算唔大升亦可回穩,三桶油之前插水咁深,家陣跟油價反彈好正常。上星期阿Man建議睇番一對手機設備股龍頭,結果亦無令大家失望,預期呢對孖寶短線仍可跑贏大市,至於其他手設股亦陪升,不過阿Man一向買大唔買細,買股買龍頭幾時都無錯。
中美雙方除暫停加徵額外關稅,中方亦承諾加碼購買美國農業、能源、工業及其他產品,以減輕兩國之間的貿易失衡。航運股早於上星期偷步,有咗貿易戰中場休戰呢個消息,航運股可以更上一層樓。大市睇住幾個位,恒指支持位喺27000點,而26800點係好淡分界,失守26800強勢或逆轉,至27500點阻力唔細,接近阻力再高追亦無肉食,唯有等回調見支持再考慮做好。
麥狄文
(徐狄怡‧證監會持牌人)