隔晚美股又玩過山車。美國提議未來幾星期之內，再跟中國展開新一輪貿易會談，主要係美國政府希望喺落實對2000億美元中國進口貨品加徵關稅之前，跟中方進行會談，避免中美貿易戰再升級。呢個消息曾刺激美股早段上升，道指更曾升逾百點，可惜中段呢個消息淡化之後，美股回落，最終道指升27點，標指僅升1 點，納指則倒跌散場。至於港股則借呢個消息反彈，隔晚喺夜期跟ADR，已重上26600點水平，今早再下一城，可惜喺26900點已經遇阻力掉頭。
恒指今早高開453點，報26798點，開市無耐就急升至26923點半日高位，可惜26900點始終係一個阻力，皆因呢個位係8月底結算後嘅一個大型密集區，唔係咁容易突破，升勢自然受阻。其後升幅一度收窄至329點，見26674點半日低位，半日恒指報收26729點，升384點；國指則報收10421點，半日升183點。
雖然美國政府有意跟中國再展開新一輪談判，不過中國暫時未有意埋枱，更表示中美新一輪貿易談判要喺美國中期選舉(11月6日)後舉行。講到尾中美貿易矛盾唔係咁易解決，加上喺呢場貿易戰上，中國一直處於下風，A股實在有心無力。不過上證指數已跌近2016年溶斷低位2647點，斷估呢個位點都有啲支持，只係缺水嚴重，A股守得住都偷笑，港股想借A股反彈上位，暫時機會較低。
不過港股由28500點雙頂回落至26200點水平，累計跌幅已達2300點，即使以黃金比例0.382一個較弱嘅反彈力度計算，大市仍有機會反彈至27078點，而大市若要回補9月5日嘅下跌裂口約27200點，即約喺黃金比反彈0.5計算27350點前面，而27250-27300剛好係另一個八月底結算前後嘅密集區。當然港股能否一級一級反彈上去，仍要內地及外圍股市配合，加上成交奀豬亦係一個大難題，暫時唔可以對港股反彈太過樂觀。
至於個股方面，騰訊(00700)連續四日回購，終見對股價有啲推動作用，暫時半日高位320.8元，反彈首個阻力約325元，留意反彈持續要守315元，否則亦係徒勞無功。其他重磅股反彈尚算有板有眼，平保(02318)跟港交所(00388)反彈亦超過2%。石油股隨油價升破80美元上升，最近有專家指油價更有機會重返100美元水平。噚日阿Man已叫咪多手去撈跌倒仆直嘅醫藥股，石藥(01093)跟中生製藥(01177)逆市再跌6.2%及4.5%，估頂摸底最無謂，繼續靠邊站睇戲。
濰柴動力(02338)半日升近5%，皆因有報告唱好，吸引阿Man望一望較為冷門嘅三一國際(00631)，集團上月公布2018年中期業績，期內錄得收入21.96億元人民幣，利潤3.58億元，分別上升83%及1.7倍。雖然有投資者擔心煤機嘅爆發性需求，喺周期性過後，2018年高增長將無以為繼，不過公司出貨訂單已排至今年12月，換句話講，上半年集團亮麗業績可延續至下半年。若將公司半年業績跟上半年相同，全年盈利7.16億元人民幣，即股價重上3元，其PE亦不過12.7倍市盈率左右，屬合理水平。加上其股價喺2.3元至2.5元已橫行整固一段時間，六月份曾升至3.04元近6年高位，其後獲利回吐，並隨大市回落。不過集團業績表現理想，估值合理加上年息率不俗，在淡市中仍吸引長線投資者，只要市況轉穩，其股價仍有機會做好。預期2019年仍可維持高收入及利潤增長，股價有機會挑戰3元後，再升至中線目標3.5元。
麥狄文
(徐狄怡‧證監會持牌人)
