有時都真係明白大台嘅劇就算個劇本有幾正都好，都堅係會被人圍插。話說小妹噚日又繼續睇套新劇，見到裏面重演「青姐落淚」嗰一幕都真係令人回味(點解落淚？因為滙控(00005)被人質到落33元(調整後價格應該係30.333元)；不過，戲裏面話公司股價由前日收市嘅86元跌到落到得20.2元，之後有買盤托返個價上去，由20.2元上返40元(咁上下啦)，但係大台就影住個報價機喺呢段時間就用綠色向上箭咀，大佬呀，20.2元上返40元呢啲叫「跌幅收窄」，唔係「升」呀，「升」係講緊同前收市價(即係86元)比較呀。我相信唔止我一個人留意到，但當我同戰友Jack開心share時，佢回我一句：「有認真過嗎？」
我都係睇返啲「正常」嘅報價好過，恒指今朝話中美有望重啟談判，所以就一個大裂口升453點，開市報26798點，依家5點59分，恒指升跌擴大至551點，做緊26896點。其實呢幾日都keep住有提過恒指日線圖上SlowSTC(14,3)落到一個超賣到無可能再超賣嘅水平，所以就算要做任何trade，都要以快打慢，盡量day trade；今日一個大裂口，將恒指由貼住拓闊中嘅保歷加通道底，一彈就彈返上保歷加下降通金中間水平，恒指牛熊證街貨圖上又彈離牛證，按牛熊兩邊最貼價嘅26200至26299點，同埋27200至27299點，用返頭牛mark低個現價(26896點)計，上行差403點，而下行就爭696點。
日線上見恒指同SlowSTC(14,3)，不過今日一彈就彈咗咁多，若然恒指要再爬上去食熊證最貼價嘅街貨的話，最低限度都要彈返上條10天線(27098點)先得，咁又唔使上到20天線(27507點)咁多嘅，呢啲嘢再睇未來走勢啦。
如果拆開恒指5分鐘圖睇嘅話，今日裂口高開已經將分鐘圖上嘅技術指標都搶高晒，依家有高位回落嘅跡象，想博埋聽日升多浸嘅話，就要吼恒指5分鐘圖出現超賣先可以啦。畫多四條線，「短期下降通道」今日突破咗，但仲未走得出「中期下降通道」嘅魔爪，繼續行以快打慢嘅策略，市彈完之後唔多郁就由得佢唔郁唔落場就算，事關今日大市靠消息彈，彈起到依家10點21分都未見方向，好似係高位發吽逗咁，就即管等佢發完先，下晝再睇。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
