熱門:

2018年1月10日 港股直擊 即巿股評

【盤房來料】內銀發力 現水平屬起步位

隔晚美股再破頂,港股今日成功挑戰12連升,早段港股仲係窒住窒住,恒指低開兩點後,落過去30929點半日低位,其後大市發力,喺金融股帶領下,半日最高升256點,見21268點,再創逾十年新高。恒指中午報收31223點,升211點;國指則報收12368點,升112點。半日成交額已突破800億元,旺丁又旺財,價量齊升。

成交保持暢旺,港交所(00388)水漲船高,港交所最高見275元,半日報收274.4元,升完再升,破晒位,繼續向300元歷史高位出發。話咗大笨象(00005)係要考耐性,等了又等今日終於發力,一係唔行,一行就升1.6%,盤中高位見82.3元,半日高收82.25元。至於騰訊(00700)噚日見過446.4元高位,今日一度舊地重遊,但最高僅見446.2元,但未能進一步突破,半日倒跌0.4元,報收443.4元。騰訊一向係大市領頭羊,今日騰訊行先一步回調,話唔定預示大市升至現水平亦要抖氣。平保(02318)同樣逆市回軟,盤中最高見84.6元,半日報收84元,大市能否進一步突破,平保同騰訊仲有冇力向前行好緊要。

內銀股一向較落後,今日發力,建行(00939)同工行(01398)半日分別升1.3%及2%,前者已升破一年高位,後者跟高位只差一步。舊年內銀股係相當落後板塊,但至上個月,阿Man已表示2018年內銀股必定要喺投資組合內佔一席位,由於美國加息將利好金融股,而內地致力改革金融業,內銀股今年將大放異彩,目前僅處於起步點,後面漫漫長路,內銀股仲有排行。

紐約油價升至三年高位,三桶油上升,但阿Man一向對油股印象麻麻,反覆難炒,高追伏味濃,所以一向有戒心。至於油服務同樣難捉模,今早油服股表現更佳,閒閒地都升逾5%。至於內房股繼續強勢,碧桂園(02007)又創18.62元新高,半日升6.5%,係最大升幅藍籌。內房股有咁強勢表現,實在始料不及,近日內房股嘅銷售成績驕人,令資金繼續留戀呢個板塊。

無論蘋果手機抑或手機設備股出貨量都未如人意,相關股份近日逆市最軟,上個月都講過呢個板塊已成資金棄嬰,博反彈短炒可以,撈到貨諗住長坐就無謂喇。至於汽車股個別發展,今日汽車製造股表現麻麻,但4S汽車銷售股有資金追捧。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads