美國總統拜登考慮到訪以色列，市場憧憬以巴局勢緩和，雙方戰爭或能受控，美股隔晚造好，三大指數上升，道指更一度升逾400點，收市則升314點，標指跟納指分別升45點及160點。反映中概股嘅金龍指數反彈0.32%，相對美股落後，但就帶動港股喺ADR及夜期回升。港股連續兩個交易日回調近600點後，半日反彈逾百點，重返20天線(17667)，不過大市波幅仍然窄，高低相距僅143點。
恒指高開165點，升幅一度收窄至31點，見17671半日低位，但A股止跌回升，港股回復升勢，半日最多升175點，見17815半日高位，中午收市總算守穩20天線。最終恒指半日收市升123點，報17763；國指報6092，升30點；恒科指升28點，收3839。半日成交額只有337億元，仍然係低成交、低波幅。
美債息略為回落，對息口最為敏感嘅科技股反彈，升得最多嘅係中芯國際(00981)同聯想(00992)，半日齊齊升逾3%，小米(01810)係近日表現較強嘅重磅科技股，再升3.2%。不過ATMJB彈力一般，除咗京東(09168)之前破咗幾次底，今日總算彈返1.8%之外，阿里(09988)、美團(03690)跟騰訊(00700)升不足1%，而百度(09888)更跌1.3%。
金融股個別發展，工行(01398)跟建行(00939)半日再升1.8%及1.1%；招行(03968)則無起跌，國家隊入場只係買國有銀行A股，招行呢啲商業銀行無份，表現自然較為遜色。平保(012318)先跌後回升，半日倒升0.1%；友邦(01299)跟港交所(00388)齊升1%，大笨象(00005)則升0.7%。
內需股今日表現唔錯，申洲國際(02313)半日升近4%，藍籌之中表現最好，康師傳(00322)亦升3.2%緊隨其後，至於百威亞太(01876)、蒙牛(02319)跟海底撈(06862)等，回升超過1%。
除咗國家隊入場買國有銀行A股，央企亦集體回購A股，阿爺決心唔想A股再墮落，市場亦憧憬A股回暖，券商股有資金流入。除咗海通(06837)半日升不足2%之外，其餘中信証券(06030)、中金(03908、華泰(06886)、光大證券(06178)及廣發(01776)升逾2%。
據市場研究公司Counterpoint數據顯示，全球智能手機市場今年第三季萎縮8%，創10年以嚟表現最差嘅第三季度，手機設備股受壓，舜宇(02382)跟比亞迪電子(00285)半日跌逾1%；通達(00698)更跌6.4%，高偉電子(01415)跌3.6%，其他相關股份半日逆市跌不足1%。
阿爺連環出招，有意穩住市場信心，噚日人行透過中期借貸便利(MLF)淨投放2,890億元人民幣長期資金，規模創年內新高。雖然阿爺奶力都出埋，不過市場反應只係一般，A股能夠止住唔跌算萬幸。雖然市場總算穩住，但入市信心不足，連日港股成交仍然偏低，短期能夠守住10天及20天線，再作整固已經算係咁。
麥狄文
(徐狄怡‧證監會持牌人)
