隔晚美股造好，今晚美國公布6月CPI數據，市場預估有所回落，憧憬加息壓力大減，美滙指數向下，推動人民幣走強，離岸價兌美元重返7.2水平之下。港股連彈兩日接近升300點後，今早再升逾200點，並收復10天線(18859)。
恒指高開137點，升幅一度收窄至79點，見18739，雖然A股表現麻麻，但人民幣反彈勢頭強勁，帶動港股再度向上，並重返10天線，最多升272點，見18932半日高位。半日恒指收報18875，升215點；國指升101點，報6396；恒科指升98點，收4101。半日成交額472.58億元，成交低迷已成新常態，升升跌跌成交都係咁上下。
藍籌股普遍向上，ATMJB全線上升，美團(03690)跟百度(09888)齊齊升逾4%至為強勁，京東(09618)升3.8%，阿里(09988)跟騰訊(00700)則升1.8%左右。港交所(00388)終有似樣少少嘅反彈，半日升1.8%；大笨象(00005)跟友邦(01299)則升不足1%。美滙指數回落，油價終於止跌回升，更升至十個星期高位，三桶油及石油相關股份亦報捷。不過生科股表現麻麻，個別股份更逆市下跌，當中諾輝健康(06606)半日跌一成半，其他生科股跌超過1%至3%。
內地谷消費 盈喜股順豐同城可留意
雖然人民幣反彈，但內地經濟數據表現動力不足，暫時未見內地再推任何刺激經濟嘅新政策，官方繼續着眼於內循環，如何帶動居民消費，日前就有人行貨幣政策委員喺一個論壇上表示，「消費回歸為政策目標之首」，難怪今日美團能夠錄得超過4%嘅升幅。如此一來，除咗消費股要留意之外，消費相關股份如物流股，亦值得望多兩眼。
順豐同城(09699)上周發咗盈喜，預期今年中期業績可扭虧為盈。順豐同城上半年成功實現盈利，主要係收入方面有良好增長，全靠訂單密度增加、業務結構向好，能進一步提升網絡規模經濟效益。運用科技驅動精益高效嘅運營底盤，提升資源投入輸出效率，毛利率及費用率亦持續得到改善。
其實早於順豐同城發盈喜前，已有唔少大行睇好其今年業績，料可受益於上述因素，預期每單平均成本可以進一步優化。順豐同城近期接入滴滴快送，覆蓋全國300多個城市，反映公司作為獨立第三方平台(服務供應商)，有中立優勢之餘，亦滿足多元化商流及其需求，可望從中推動其ToB收入持續快速增長。隨住順豐同城品牌影響力不斷擴大，其市場份額跟品牌認知度不斷提升，形成更强網絡效應，吸引更多商家入駐。而公司同時進一步提高騎手團隊能效，實現更高效嘅配送服務，進而帶動業務增長及盈利能力提升。
自從順豐同城喺5月底被納入MSCI中國小型股指數後，股價表現明顯跑贏大市，自年初計，其股價累計反彈逾兩成，同期恒指則跌7%。順豐同城估值亦較同業低，目前其市銷率約0.8倍，相對同類型股份美團(03690)的3.12倍及達達(DADA.US)的1.03倍，順豐同城更值博。
麥狄文
(徐狄怡‧證監會持牌人)
