熱門:

2023年2月1日 即巿股評 港股直擊

【盤房來料】確認短期見頂 回調首目標先補21000裂口

美國聯儲局議息在即,喺未有議息結果之前,公布末季勞工成本增速慢過預期,市場憧憬FOMC有晒條件放慢加息步伐,美股隔晚上升,三大指數升逾1%。港股兩日回吐逾800點後,今早表現反覆。

恒指高開78點,其後公布的財新1月份中國製造業PMI差過預期,大市掉頭向下,最多曾倒跌138點,見21703半日低位;之後止跌回升,最多升121點,見21963半日高位,但仍無法收復10天線(21976),唔排除10天線短期由支持變成阻力。恒指半日收21902,升60點;國指報7496,升71點;恒科指升78點,收4621。半日成交額不足800億,只有799.32億元,雖然低位有買盤,但從成交睇,呢啲位資金買貨未敢積極。

藍籌股個別發展,今日輪到ATMJ幫手托住個指數,雖然騰訊(00700)半日要跌0.3%,但相對低位都彈返唔少;至於美團(03690)、阿里(09988)跟京東(09618),早段都唔算跌得多,到中段成功轉燈反彈,半日以美團升2.6%最強硬,阿里升近1.9%,京東則升不足1%。靠呢四大天王,大市先得以止跌回升。不過,金融股今日腳軟,大笨象(00005)半日跌2.5%,友邦(01299)亦跌2%,其他銀行股普遍下跌,跌幅由0.2%至超過2%不等,招商銀行(03968)半日更跌2.8%,成為跌幅最大藍籌股。

風電股今日表現較差,龍源電力(00916)發盈警,股價半日跌半成,其他綠能股均見下跌,不過跌幅唔算厲害。相反,汽車股氣勢強勁,連日未有隨大市回調,比亞迪(01211)半日再升5.7%,成為升幅最大藍籌股;其他電動車股表現更強勁,電動車三傻全部升逾半成,理想汽車(02015)升8.7%,小鵬(09868)升7.6%,蔚來(09866)升5.9%,零跑(09863)升5.2%。其他汽車股亦有超過3%升幅。

受惠四川省生育登記取消結婚限制,刺激三孩概念股上升,當中中國育兒網絡(01736)半日勁升64%,寶寶樹(01761)更爆升超過七成,好孩子(01086)則升一成。對於呢啲股仔,阿Man就無乜興趣,當然跟勢炒係無問題,但見好要識收,尤其炒消息,一日半日炒完,隨時無影,食少多教訓,都係做觀眾,食吓花生算。

暫時大市受制10天線,短期22700見咗頂,回吐到10天線未能修復嘅話,考驗20天線嘅機會較大。一旦再失守20天線21497,回補21000裂口亦不為過。若然睇返長少少幅日線圖,若然10月14600係底部,要完成頭肩底形態,右肩係要落到20000左右,亦即係250天線(20224),有機會係今次整個調整浪嘅終極目標。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads