隔晚美股假後復市，高盛公布業績後股價跌6%，影響埋其他銀行股表現，拖累道指下跌391點，標指亦跌8點，暫時仍未重越4000大關；不過納指則錄得七連升，再升15點。至於反映中概股表現嘅金龍指數則跌逾3%，拖累今早恒指低開。
恒指低開62點，一度跌155點，見21422半日低位，10天線又見支持，更止跌回升，一度倒升114點，見21691半日高位。但其後升勢不保，半日恒指收報21549，跌28點；國指報7303，跌10點；恒科指則跌7點，收4492。半日成交額725.54億元，以長假期前嚟講，成交縮水情況都唔算太嚴重。
藍籌股個別發展，大笨象(00005)跟友邦(01299)偏軟，齊齊跌0.2%，但沽壓又唔算大，友邦暫時仍守85元，大笨象則早段見過56.75元月內高位，半日微跌但仍企穩55元。收息之選中移動(00941)半日升0.5%，但另一高息股中海油(00883)則跌1.4%。不過創科(00699)就升5.3%，藍籌之中表現最好，安踏(02020)亦升1.5%。
科網股同樣個別發展，當中以手遊股表現較佳，騰訊(00700)半日升1.1%，網易(09999)更升4.3%，主要係兩者均獲配遊戲版號。同獲批版號嘅心動公司(02400)半日升逾半成；網龍(00777)亦錄1%升幅，但嗶哩嗶哩(09626)則跌1.8%。其他科網股見腳軟，美團(03690)已連跌九日，今日半日再跌1.3%，160元係較近期支持位，未知能否守得住。京東(09618)半日跌3.7%，近日持續跑輸畀阿里巴巴(09988)，阿里半日則跌0.8%。百度(09888)半日跌4.5%，藍籌之中跑第尾。
內地自放寛防疫措施並恢復通關後，澳門遊客大增，澳門旅遊業協會會長胡景光表示，整體酒店1月份首周入住率達七成。濠賭股全面造好，金沙中國(01928)跟銀娛(00027)半日齊齊升逾3%，兩股在多間大行眼中，係濠賭股嘅首選；其他濠賭股亦錄得超過1%升幅。
緊接藥明生物(02269)主要股東減持後，輪到諾輝健康(06606)與亞盛醫藥(06855)雙雙配股，不過諾輝先跌後回升，半日倒升0.6%，亞盛半日卻跌逾一成。藥明生物承接昨日跌勢，半日再跌1.7%，同系藥明康德(02359)則跌0.8%。其他生科股個別發展，普遍都要下跌，但阿Man愛股之一嘅信達生物(01801)半日則升1.1%。
港股暫時高位繼續震盪，雖然喺現水平未見再有大量資金流入追貨，但沽壓亦有限，港股唔係好肯回，今早回到10天線已見支持，睇嚟過年前守到條10天線，放完假返嚟喺無北水之下，外資又可以為所欲為，唔排除放完假返嚟又挾高等北水假期完結之後先喺高位派一派貨。即使阿Man認為個市由低位累計升咗五成，都係時候出現一個較大幅度調整，但喺長假期前，個市又唔多肯回，開淡都無謂，少做少錯，等過埋年返嚟再算，呢兩日忙於大掃除同埋辦年貨，炒少幾日，再等假期後搵個良辰吉日再開工。
麥狄文
(徐狄怡‧證監會持牌人)
