隔晚美股個別發展，資金流向傳統舊經濟股，科網股繼續捱沽，道指盤中曾升逾500點，無奈重磅科技股都要跌，收市抹去過半升幅，僅升194點，標指跟納指則分別跌23點及178點。預咗標指跟納指反彈至阻力位會變得反覆，而道指已開始呈超買，加上業績期已接近尾聲，美股隨時反彈結束。至於港股今早偏軟，北韓今早又玩導彈，震散亞太區股市，喺期指結算日，港股半日再跌逾300點，接近今個月低位結算。
恒指低開3點，曾升14點見15441半日高位，可惜北韓玩飛彈，喺地緣政治局勢再度緊張下，港股再度下跌，半日最多跌363點，見15064半日低位。中午恒指報收15069，跌358點；國指跌150點，報收5092；恒科指又跌逾3%，半日跌111點，報2877，3000大關得而復失。周末前夕半日成交額縮水至598.08億元，嚟到呢啲低位，都無乜資金願意入場接貨，睇見都心酸。
藍籌股早段仲有啲金融股頂住，而科網股就由頭跌到尾，ATMJ全線走低，騰訊(00700)、美團(03690)跟京東(09618)半日齊齊跌逾5%。友邦(01299)跟大笨象(00005)由升轉跌，半日分別跌1.8%及0.1%。就算財爺話邀請沙地阿美嚟香港上市都好，講緊都唔係短期嘅事，但市況差，市場無信心，資金流走唔返轉頭就已成事實，港交所(00388)威咗一兩日，今日又回復跌勢，半日跌2.8%，又失220支持。
公用股成為資金避風港，資金流入公用股等收息，電能(00006)逆市升2.7%；領展(00823)揚2.5%；中電(00002)升1%；長建(01038)走高0.5%，四股齊齊逆市上升，成為表現好藍籌股。港燈(02638)跟香港電訊(06823)半日升1.4%及1.3%。不過內地電力股就跌到唔識停，半日內地電力股再繼續插水，閒閒地跌半成而上，弱勢已成，暫時咪多手博反彈。
汽車股同樣跌唔停，就算公布業績有增長，無奈前景唔明朗，尤其喺經濟環境變差下，未來汽車銷售情況令人擔心，整個汽車板跌到一個七皮，跌幅由5%至超過一成不等，蔚小理重，三股以小鵬(09868)最傷，半日跌12.6%。
人民幣前日急彈後見回吐，內房物管股又插水，龍湖(00960)旗下一款債券於內地跌停，其股價半日跌7.6%，其他內房股全線下瀉，跌幅由2.8%至近一成不等。二十大並未見有任何措施扶持內房股，加上人民幣勢弱，內房股都係無得救。
麥狄文
(徐狄怡‧證監會持牌人)
