美股隔晚低開高走,維持升勢,道指已連升四個交易日,而反映中概股嘅金龍中國指數亦連續第四日走高。港股噚日跌134點,不過仍守二萬關之上。今早港股一度升逾百點,可惜成交薄弱,缺乏進一步上升動力,升幅大大收窄,半日成交額只有412.12億元。
恒指高開66點,其後曾升132點,見20173半日高位,但20天線(20250)前見阻力,加上騰訊(00700)跟阿里(09988)逆市下跌,一度拖累恒指倒跌15點,見20025半日低位,不過20000有支持,大市止跌回升。半日恒指升22點;報20063;國指升19點,報6834;恒科指升3點,報4311。半日交投維持淡靜,買賣兩閒情況持續,悶局未能打破。
據路透引述消息人士報道,內地金融監管部門推出新措施緩解內房流動性壓力,由國有增信機構中債信用增進公司對民營房企發債開展效力更強的「全額不可撤銷擔保」。內房物管股借呢個消息沖喜,落鑊炒一轉,藍籌內房股中,以碧服(06098)半日升16.2%最厲害,碧桂園(02007)半日升9.4%,兩股成為表現最佳藍籌股。其他內房股跟物股管普遍反彈,升幅由超過2%至超過一成不等。不過內房股喺港股呢邊反應就大啲,但係內地嘅內房股升勢就無咁勁,加上個消息都係由外電報道,並非官方落實嘅消息,無貨都咪多手追,皆因內房嘅債務問題未有耐可以解決到,追貨好易又被套死資金。
電力股嘅利好消息就實淨少少,四川啟動三級保供電措施,以保障民生用電,電力股全線走高。板塊內股份升幅由超過1%至5%不等,只係升勢可以維持幾耐,好難寫包單,尤其係市底較弱,成交欠奉下,升一日隨時又無晒影。
麥狄文
(徐狄怡‧證監會持牌人)