熱門:

2022年8月10日 即巿股評 港股直擊

【盤房來料】港股一潭死水更見陰乾

美股隔晚走軟,市場等待今晚公布嘅7月份CPI數據,而內地7月CPI就今早已公布,國家統計局公布,7月份全國居民消費價格指數(CPI)按年升2.7%,升幅較上月擴大0.2個百分點。今年首7個月,CPI按年升1.8%。內地CPI再升,拖累中港兩地股市走弱,而港股更挫逾400點,恒科指跌幅更超過3%。

恒指低開46點,開市價19956已經係半日高位,其後內地公布通脹數據後,大市拾級而下,最多跌437點,見19565半日低位,其後一直低位徘徊。中午恒指收19588,跌414點;國指跌159點,報6634;恒科指則跌133點,報4161。半日成交額只有478.57億元,繼續淡靜,日日成交咁奀,個市遲早陰乾。

藍籌股普遍向下,大笨象(00005)跌0.4%,已經叫做頂得吓;友邦(01299)跌1.8%,暫守75元支持;港交所(00388)喺成交低迷下受壓,半日再跌2.5%。科網股幾乎全線向下,ATMJ全部下跌,騰訊(00700)快將公布季績,半日跌1.3%;阿里(09988)派完成績表後,股價持續受壓,莫講話紅底身份收復唔到,就連90水平亦失守,半日再跌2.4%;京東(09618)跟美團(03690)半日跌逾4%,但要博反彈,阿Man都係偏好呢兩隻。其他科網普遍跌逾1%至4%不等。

除咗科網股走弱,今日生科股亦見沽壓,藥明生物(02269)半日無啦啦跌近一成,藍籌之中表現最差,其他生科股全線走弱,剛剛公布咗好消息無耐嘅信達生物(01801)半日跌3.7%,經過幾日回吐,又打回原形,股價又重返35元水平之下。其他生科股閒閒地跌3%或以上,跌幅超過半成嘅比比皆是。

唔止科網股跟生科股走弱,今日連汽車股亦死死吓,口痕友講笑話農曆七月陰氣重,港股亦陰陰落,各個板塊如同撞鬼一樣,嚇到識跌唔識彈。Tesla舵手馬斯克,喺4月份時為咗要收購Twitter而沽貨,套現咗85億之後,明明話過無進一步出售股份計劃,誰知條友喺8月5日同8月9日再沽咗幾百萬股,搞到汽車股板塊嘅氣氛急轉直下,比亞迪(01211)半日跌4.1%,而中概汽車三傻,理想汽車(02015)插5.7%,小鵬(09868)大跌7.5%,蔚來(09866)挫6.5%。至於其他汽車股,早已跌先一步,今日就跟返成個板塊再跌,真係多得馬斯克唔少。

暫時港股又落返嚟19500水平,喺缺乏資金流入,又冇乜好消息刺激下,都係低位徘徊,搞吓搞吓好易又落返19000至19200,但去到19000邊唔排除又有買盤趁低吸納。總之暫時喺成交欠奉下,大市都係喺19000至20000之間上落,悶局一場,咁搞法,只有更加趕客,葉劉與其建議減內地客DSD救樓市,不如建議減港股印花稅,救救港股啦!

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads