美國聯儲局隔晚議息,一如預期加息0.75厘,但主席鮑爺強調美國經濟唔會陷入衰退,加上表示某個時間放慢加息係合適做法,令美股樂觀情緒更一上層樓,美股三大指數上升,納指更升逾4%。不過今早美股期貨回吐,港股當然跟唔到美股隔晚升勢,表現反覆,恒指10天線(20659)得而復失,大市維持弱勢。
恒指略為高開35點,早段好淡爭持,忽升忽跌,盤中曾升102點,見半日高位20772,但10天線未能企穩再度失守,大市再度掉頭向下,最多跌136點,見20533半日低位。半日恒指報20554,跌115點;國指報7060,跌31點;恒科指半日升12點,收4549。半日成交額只有489.53億元,繼續淡靜,港股缺水情況仍然嚴峻。
藍籌股跌嘅居多,雖然恒科指係微升,但除咗騰訊(00700)升0.5%之外,阿里(09988)、美團(03690)跟京東(09618)都要跌。其中美團非執董兼紅杉資本創始及合夥人沈南鵬,由上星期四到今個星期一,都喺市場減持,半日跌1.2%。百威亞太(01876)中期多賺24%,半日升唔夠1%。而銀娛(00027)半日升2.7%,係表現最好藍籌股。
至於內房股跟物管股噚日回吐,今日表現都係麻麻,龍湖(00960)向合營夥伴合景泰富(01813)買入九龍東啟德尚.珒溋項目,龍湖挫4.4%,為表現最差藍籌;其他內房股普遍腳軟。物管股沽壓亦唔少,暫時呢兩個板塊仲係反覆,兼且充斥住不明朗因素,想買貨都忍忍手,睇定啲再算。
教育股今日表現突出,新東方(09901)計劃回購最多4億美元股份,半日急升近一成;同系新東方在綫(01797)更升14.3%,其他教育股亦受帶動,升幅由1.8%至超過一成不等。只係市況偏軟關係,一個板塊單日有資金流入,翌日買盤可以消失到無影無蹤,所以阿Man都係食花生,唔會多手去追貨。
麥狄文
(徐狄怡‧證監會持牌人)