美股上周反彈，市場對美國聯儲局加息1厘嘅憂慮有所緩解，市場傾向相信今次議息可能只會加息0.75厘，美股大幅反彈，三大指數上升，帶動上周跌足五個交易日嘅港股反彈，恒指上午反彈逾500點。恒指高開181點，其後升幅一度收窄，曾倒跌3點，見20294半日低位，其後喺內地股市帶動下，逐步回升，升幅更持續擴大，最多升552點，見20850半日高位。恒指中午報收20820，半日升523點；國指半日升204點，報7162；恒科指半日升121點，報4561，更成功收復50日線(4495)。
藍籌股大部份上升，只有比亞迪(01211)逆市跌0.2%，吉利(00175)則持平，其他藍籌股全面向上。美團(03690)半日升6.8%，為恒指貢獻唔少，ATMJ之中表現最好。騰訊(00700)早段曾低見321元，見四個月低位，半日倒升2.3%；阿里(09988)一度跌穿100元，半日倒升1.7%；京東(09618)半日升3.4%，企穩240元水平。雖然油價回落不少，但俄羅斯可能隨時中止向歐洲多國暫停供應天燃氣，加上油組未有承諾增產，石油股回升。
內房跟物管股反彈，銀保監指將千方百計確保交樓，多個涉及停貸風險樓盤復工，上周顯著下跌嘅內房及物管股止跌。而一直未見有任何項目停工，又或延期還息還本嘅碧桂園服務(06098)宣布進行回購，而早前同樣表示將進行回購嘅碧桂園(02007)跟碧服，半日齊齊反彈超過8%。其實作為三間示範內房民企之一嘅碧桂園，財政狀況一直未有出問題，加上亦未涉任何違約延期還債，加上亦無任行項目停工，今次嘅斷供風暴，真係死得有啲無辜，只要今次斷供風暴過去，預期碧桂園將成為生還者。其他內房股亦見反彈，普遍回升超過半成。
有消息指理想汽車(02015)L9試駕車空氣懸掛斷裂，股價先跌後回穩，扭轉早段跌幅，回升0.1%。其他汽車股個別發展，汽車零件股表現較為突出。另一個表現較突出板塊係航運股，市場對經濟衰退憂慮暫時緩解，航運股反彈。
大市暫時離唔開上落市格局，雖然上周嘅跌勢，令唔少人認為大市將要失守20000大關，結果今日略為見一見20300附近嘅低位，指數已即反彈，更重上20800水平，又收復返日線圖頸線，只要仍然守住20600-20800，港股跌勢暫時可告一段落。而港股暫時仍然係區間上落，移動區間大約係20200至22200之間。
麥狄文
(徐狄怡‧證監會持牌人)
