熱門:

2022年5月19日 即巿股評 港股直擊

【盤房來料】港股二萬關樓上唔值博

美股彈完一陣又無力,隔晚回復跌勢,三大指數齊插水,道指更跌逾千點,不單止係2020年6月11日以嚟嘅最大單日跌幅,仲係2021年3月以嚟新低。標指跟納指更加慘烈,兩指數跌幅超過4%,又雙雙回落至下跌通道底部,隨時又再穿底。美股咁搞港股今早預咗裂口低開,好彩係內地股市都算企得定,唔跌得多,加上道指期貨倒升,恒指一度跌700點後跌幅收窄,唔單止二萬大關失而復得,仲成功收復埋條10天線(20090點)。值得留意係幾條移動平均線一直向下移,暫時恒指仍受制於由上月22500水平延伸至今嘅下降軌,一日未能突破呢條下降軌,港股都難言轉勢,頂多都係反覆上落。

恒指今早低開497點後跌勢加劇,20天線(20313)輕易失守,其後更接連穿10天線及20000點大關,半日最多跌719點,見19924半日低位。其後內地股市跌幅收窄,道指期貨倒升,港股跌幅亦收窄至366點,見20277半日高位,收復10天線及20000大關。中午恒指收20179,跌464點;國指收6927,跌161點;恒科指半日收4115,跌145點。半日成交增至723.78億元,升市成交縮,跌市成交增,唔係乜嘢好事。

藍籌股之中,以創科(00669)表現較差,半日跌近7%,噚日進賬嘅升幅全數泡湯。其他重磅藍籌股,當然係科網股跌幅較為顯著,騰訊(00700)季績差過預期,連續兩季業績都令人失望,股價半日跌6.6%,緊隨創科之後。暫時騰訊支持位喺330元左右,但上面呢就375元已封咗個短期頂。雖然業績唔係好,但現價估值又唔算太貴,所以呢段時間可能都係區間上落居多。

至於其他AMJX,今日輪到小米(01810)公布季績,都唔會有咩驚喜,半日隨大市跌3.4%,講真股市無新資金入場,就算短線反彈,重磅股都未有耐炒到小米。阿里(09988)半日跌6.1%,股價又重返90元之下,半生不死咁嘅狀態,但估值唔算貴,又大力質低亦於心何忍。美團(03690)呢期算係重磅科網股中表現最強,升嘅時候份外夠力,多得北水密密掃貨,跌嘅時候相當克制,半日跌3.2%都算係咁。其他藍籌股見紅居多,大笨象(00005)半日跌1.5%,友邦(01299)急升後今日僅回0.6%已算唔錯,只係80元由以前嘅支持位,漸變成阻力位。

歐盟委員會公布能源計劃減少對俄羅斯依賴,其中到2025年太陽能光伏發電能力增一倍,光伏股逆市向好,大部份升幅都超過5%。不過咁,歐盟話要增加太陽能光伏電力,其實又關內地光伏股乜嘢事,擺明又係搵個借口落鑊炒一轉,無貨喺手追亦無謂。

總括嚟講,港股都係上上落落,美股弱勢拖累港股難升,不過阿爺出晒口術,擺明唔多想中港兩地股市日復日跌,港股夾喺中間,就只有上上落落,要等機會出擊,就要留意特價時段,點為之特價,斷估都唔會係20000樓上呢啲位。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads