熱門:

2022年5月17日 即巿股評 港股直擊

【盤房來料】反彈持續奈何成交不足

隔晚美股個別發展,納指跌超過1%,不過啲中概股表現又唔差,人仔彈返啲,加上阿爺唱好,發改委相信經濟運行很快回歸正常,中港兩地股市都造好。港股之前兩日已升逾500點,今日再下一城,恒指半日進賬近500點,重上20天線(20388)。

恒指今早高開243點後,升幅略為收窄至219點,見20169半日低位,之後A股回升,港股升幅再度擴大,升494點,見20445半日高位,成功收復20天線。恒指半日收20395,升445點;國指升174點,報7000;恒科指半日收4210,升170點。不過以半日升近500點嚟講,只有625.27億元成交又真係少咗啲,予人乾挾感覺多啲。

藍籌股大致向好,重磅股友邦(01299)半日升近4%,對指數貢獻良多,留意短線阻力80元,之前低位有撈貨,不妨睇位75.3元今日開市價,暫時用住呢個位做止賺定去留。相對另一重磅金融股大笨象(00005),半日僅升0.5%,表現就無友邦咁醒神。一般嚟講,啲人認為加息周期就買銀行股,但銀行股嘅利潤會因為利息收入增加,但若然係經濟好梗係無問題,只不過目前係有陷入滯脹嘅風險,物價上升之際,經濟步伐跟唔上,甚至可能衰退,咁就算加咗息,市場貸款需求因為經濟唔好少咗,又或者係壞賬率上升,都會影響銀行嘅盈利表現,所以唔係任何情況都係加息就要買銀行股嘅。好似今輪反彈浪咁,內銀股就真係無乜表現,上半場招行(03968)彈咗6.7%,都只係因為之前跌得勁,鐘擺效應咪彈返多少少。

科網股今日都係全線向上,京東(09618)今日收市後派季績,雖然已有預測首季業績或者有倒退,但半日股價仍彈5.5%,向住220元呢個反彈目標出發。其餘ATMX全線向上,京東派完季績,跟住明日輪到騰訊(00700),後日到小米(01810),兩股半日分別升3.3%及4.5%。其他科網股半日普遍升3%或以上。

今日汽車股表現突出,近日持續有利好行業政策出台,最新鮮嘅當然係講緊汽車下鄉,龍頭比亞迪(01211)半日升6.4%,之前有關環保出咗少少問題,市場都似乎忘記得一乾二淨。上星期出呢個所謂利淡消息,反而畀咗大家一個喺210元上車嘅好機會,一星期過去,股價話咁快又彈返兩成。幾時都話汽車股中,龍頭比亞迪係不二之選。其他汽車股全線向上,半日升超過3%至一成不等。連帶汽車零部件股亦上升,最難得係生產汽車鏡頭模組嘅龍頭舜宇光學(02382),半日升一成,低位橫行咗咁耐,儲夠力終於爆一爆。

阿Man一直認為5月份係上落市,目前呢個睇法不變,上周當大市回落至19200水平,當坊間唔少人認為個市要再殺落去,甚至穿底,但上周初阿Man不單止平晒所有淡倉,而且仲買入唔少指數成份股,包括騰訊、美團(03690)跟京東(09618)等等。而經過一星期反彈後,指數唔覺升咗過千點,成功收復10天及20天線,當然下一個目標係50天線,目前大約喺21000左右,當然呢個係較為理想嘅反彈目標。只不過目前成交都真係完全唔配合,相對3月中見底嗰次,講緊去到2000億,甚至3000億嘅成交,家下係只有三份一左右,所以今次反彈21000都已經好係博得好盡,嚟到20500開始,將上周撈嘅貨沽出,鎖定盈利都好合理,畢竟目前都係熊市中嘅反彈,而並非大牛市。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads