熱門:

2022年5月16日 即巿股評 港股直擊

【盤房來料】三民企內房被欽點為示範民企 碧桂園榜上有名

美股上周五三大指數反彈,主要係受到債息略為回落所帶動,港股上周五已先行一步,至夜期及ADR再下一城,今早恒指亦高開,不過20000點關得而復失。恒指高開232點,半日最多升274點,報20173;其後內地公布4月份社會消費品零售及工業增加值均遠遜市場預期,中港股市升幅收窄,恒指更倒跌133點,見半日低位19764,中午報收19825,跌73點;國指則跌33點,報6773;恒科指跌11點,報4027。半日成交額只有533.88億元,靜過鬼,無成交配合半日掉頭升唔起都好正常。

藍籌股表現好壞參半,油價上周五回升,但三桶油跟唔到,最叻嘅中海油(00883)半日都只係升0.8%。平保(02318)首四個月保費收入升0.4%,股價半日跌1.1%,其他內險跟內銀股表現較差,上半場都係跌嘅多,主要因為中國4月份新增貸款僅6454億元人民幣,為2017年12月以來最少,遠低過預期。中行(03988)跌1%;工行(01398)跌0.9%;建行(00939)跌0.7%,只有招行(03968)則升1.2%。。另外汽車股都見有啲回吐,比亞迪(01211)先升後回,到咗阿Man嘅短炒目標240元見過241元,但企唔穩,半日倒跌少少;吉利(00175)半日更跌2%。

至於科網股,今日摩通出報告唱好,明明3月中啲中概科技插水嗰陣,佢就出報告調低晒啲目標價,又話唔買得呀,乜乜物物,咁呢當時就見咗底,今次佢唱反調,上調多隻股份評級及目標價,真係有啲擔心呢批股份隨時個反彈浪又行完。好似美團(03690)係今次反彈浪嘅火車頭,但今日先升後倒跌,率先回軟,半日倒跌3.6%,都唔知係咪有人睇咗細摩份報告就對著幹。騰訊(00700)星期三派成績表,半日亦倒跌1.1%;京東(09618)明日公布季績,半日倒跌0.3%,唔知下半場可唔可以企返上200水平。其他科網股表現平平,細摩呢份報告真係唔知攞景定贈興。

內地首套房貸款利率降20個基點,內房股早段升得唔錯,但至中午收市,大部份升幅縮水,跟返個市回。不過有消息指碧桂園 (02007)、龍湖 (00960) 、美的置業(03990)三家民營房企被監管機構選定為示範房企,將於本周陸續發行人民幣債券。其中碧桂田園一向係阿Man較喜愛嘅內房股,主要係喺內房債爆嘅時期,碧桂園接連成功融資,並積極進行收購,一直以行動反映其財政狀況遠較其他民企內房健康,呢個亦係阿Man多次推介碧桂園嘅原因。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads