美匯指數創兩年高位，加上通脹高企，市場認為聯儲局收緊貨幣政策步伐加快，另一方面，亦憂慮整體經濟放緩而基本面開始顯著惡化。俄烏戰事持續，更有憂慮戰事或引發核武威脅；美國通脹高企，亦會削弱消費需求；同時中國經濟情況亦影響到美國科技業，因美國對中國半導體及供應鏈有一定依賴。美股隔晚三大指數顯著下挫，納指更跌穿3月低位，創今年新低，已較高位回落23%。市場對美股睇法愈趨悲觀，就連大好友亦開始轉軚，大摩都開始唱淡美股。
美股跌成咁，本來港股都死硬，但內地首季工業企業利潤增加8.5%，A股今早低開高走，帶動港股先跌後回升，不過暫時受制20000點大關。恒指低開211點，最多跌269點，見19665低位，其後A股回升，港股亦收復失地，半日最多升52點，見19987半日高位。恒指半日收報19952，升18點；國指中午收6783，升36點；恒科指半日升48點，報3963。
藍籌股個別發展，美團雖然關停旗下美國優選北京業務，但股價未受影響，半日反而升近半成。京東(09618)半日亦升3.8%，但騰訊(00700)跟阿里巴巴(09988)則分別跌0.2%及0.3%。友邦(01299)半日升2.5%，但相反大笨象(00005)則跌勢未止，半日再跌逾3%。呢幾隻重磅股半升半跌，令指數唔上唔落，暫時大市無乜明確方向。明日期指結算，可能要過埋結算，大市先會有較明確方向，加上下周美國聯儲局議息，香港呢個星期又係長周末假期，都係少做少錯，唔做唔錯。
中央財經委員會昨日召開第十一次會議，會中強調全面加強基礎設施建設，帶挈基建水泥股造好。基建股普遍錄得超過1%升幅；水泥股升幅更大，閒閒地升2%或以上，龍頭股海螺水泥(00914)半日升6.4%。內需股今日表現亦唔錯，繼續反彈，只係近日大市反覆無常，今日強勢嘅板塊，升勢未必能維持，可能升完一日又無影，高追根本值博率唔高，都係眼看手勿動。
大笨象(00005)跟恒生(00011)噚日派成績表，前者講明難以再加碼回購，股價錄得四連跌；後者則減少派息，季度派息減至0.7元，27年以嚟最低，兩股今日分別再跌逾3%。其他本地銀行股今日偏軟，當中大新銀行(02356)更錄得七連跌。雖然息口趨升，但銀行息差唔會因此拉闊，加上喺疫情下百廢待興，銀行係百業之母，喺如此經濟情況下，業績又點會好。
麥狄文
(徐狄怡‧證監會持牌人)
