隔晚美股拗腰回升，三大指數接近當日高位收市，加上阿爺又發功，人行噚晚突然宣布下調金融機構外滙存款準備金率1個百分點至8%，以提升金融機構外滙資金運用能力。人行講到明關注到近期金融市場出現波動，主要受投資者預期及情緒影響，所以加大穩健貨幣政策對實體經濟嘅支持力度，特別係支持受疫情嚴重影響行業及中小微企業、個體工商戶。人民幣低位反彈，中港兩地股市亦見回升，恒指二萬大關失而復得。
恒指高開119點，喺人民幣持續回升下，港股升幅擴大，重上二萬大關，半日最多升383點，見20252點，中午接近高位收市。恒指收報20244，升375點；國指收6866，升182點；恒科指半日升204點，報4010。半日成交額638.97億元，以成交嚟講唔算多，始終資金都傾向較為保守。
藍籌股中當然係重磅科網股最勇猛，京東(09618)更加係勇中之勇，半日升近一成，係表現最好藍籌及恒科指成份股。美團(03690)半日彈7.7%；就連一向最弱嘅阿里(09988)半日亦彈近7%。騰訊(00700)彈3.2%唔算多，但小米(01810)就連3%都冇，叫做上返11元，但都未知企唔企得穩，表現係特別弱過人。至於其他中概科網股，普遍升半成以上，已經算有交代。
雖然內地疫情反覆，北京亦有機會面臨局部封城，上海就仲未解封，但內需股今日亦隨大市反彈，主要係疫病防控專家認為疫情趨勢有好轉，餐飲股乘機反彈。之前跌到死死下，海底撈(06862)跟呷哺呷哺(00520)，半日分別升逾9%及7%。不過反彈唔係追貨嘅時候，阿Man反而覺得係逃生門打開，有貨好趁走鬼人道走廊開放減磅實際啲。
人民幣回升對內房股同物管股係好事，今日兩個板塊都見反彈，當中以碧服(06098)半日升7.5%至威猛，其他物管股普遍升5%以上，而內房股嘅反彈力就略差一皮，無乜邊隻內房股半日升多過半成。
噚日港股無因人仔急墮而下跌，今日因為阿爺出招反彈，可惜睇成交都唔見得缸邊友好肯入場追貨，反而係趁反彈減磅居多，睇嚟大市自3月中低位反彈至22400水平嘅反彈浪結束，並完全回補上升裂口底部後，未見展開新一輪升浪。若然今日大市未能企穩喺上月中上升裂口底部，即20100點，後市似乎係瓜多過菜。加上牛證數目又增加，大市暫時都只會反覆上落，又步入有波幅，冇升幅嘅悶局。
麥狄文
(徐狄怡‧證監會持牌人)
