熱門:

2022年4月14日 即巿股評 港股直擊

【輪證贏家】高槓桿牛加快爬格仔速度

噚日下半場無太多動作,只係純綷等收市之後,同師兄老樓去High個Tea,每次同佢見親面都會有嘢袋到落袋(可能佢唔知啦),今次短聚個零鐘,好記得佢嘅一句說話:「呢個只係一個過程嚟架啫。」令我沉思咗一陣,真係,每一個Status都只係一個過程,諗番起自己以前所有經歷過嘅事都真係只係一個過程,恐怕目前嘅情況都只是一個過程,沉著氣就可以。多謝師兄(仲有你餐飯,我當係提早同我食生日飯啦^_^)。

今朝早望出窗天朗氣清,恒指完U後都見陽光,開市報21463點,升88點。喺五分鐘圖上見到指數裂口高開,重上返各主要平均線,不過就同保歷加通道頂線剛好重疊。轉去小時圖睇則見到指數重上保歷加上升通道,不過通道口愈收愈窄。明白嘅,一連四日復活節假期在即,點會唔悶呀。

稍為處理完一啲稅務問題之後,依家10點6分,見指數喺五分鐘圖上落到去50分鐘線(五分鐘圖10線)、100分鐘線(五分鐘圖20線)同500分鐘線(五分鐘圖100線),三線匯聚支持後,指數反方向踩住50分鐘線而上,吼呢個位而出好倉嘅話,真係要揀隻貼價、高槓桿嘅牛證,將爬格仔嘅速度加快先得。點解咁講,睇小時圖就知。

小時圖上見到恒指由4月12日中午過後開始,至今築起「上升通道」而上,「上升通道」底線同10小時線(小時圖10線)幾近重疊,本來係一個美好嘅上升形態,但可惜保歷加通道口收窄中,限住住指數嘅上/落空間。10點20分時指數高衝一下,升過百點,再上21500點以上位置之後,同步於小時圖上見指數都彈高到保歷加通道頂線,但仍然未見到保歷加通道有拓闊嘅情況,所以目前見,指數喺五分鐘圖上稍為回落。

咁理解,指數以小時圖沿「上升通道」再推升的話,第一件事必須要嘅係保歷加通道口要拓闊先可以,暫時未見到,可能喺下個一小時圖上會出現。恒指牛(50747),非常進取的用上收回價為21078點嘅牛證,同現價只有約350點收回距離,因為要用高達約47.62倍嘅槓桿去加快爬格仔嘅速度,以五分鐘圖上見指數回落到50分鐘線見企穩時出動,因為今日如果持貨過夜,就要過四日嘅復活節假期㗎啦。

作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads