雖然美期今早下跌,港股略為高開後曾反覆回落,但跌至21200水平見支持回升。恒指高開17點後回落,一度跌202點見21202半日低位,但在10日線(21162)及20日線(21226)之間見支持,其後喺重磅科技股回升下反彈。恒指半日最多升386點,見21790半日高位,中午報收21683,半日升278點;國指半日升127點,報7411;恒科指半日升133點,報4512。
美團(03690)公布上季業績好過預期,股價半日急升14.3%,成為表現最好藍籌股,騰訊(00700)半日升3.8%,阿里(09988)高達250億美元嘅回購計劃,對股價嚟支持,半日亦升3.6%,三股合力推高恒指270點,幾乎已等於半日升幅。由騰訊派發嘅京東(09618)股份已到手,開始於市面流通,今早京東曾跌至接近210元水平,同時亦見大量碎股交易上板。其實今朝京東有啲跌過籠,即使多咗呢批碎股,亦唔代表沽壓會大大增加,當京東急跌逾4%,開始有買盤趁低吸納,股價跌幅半日收窄至2%。
金融股個別發展,友邦(01299)靠穩,大笨象(00005)半日升1%,其他內銀股則略為偏軟,但沽壓唔算大。至於內房股表現作軟,由於唔少內房有意申請延遲公布業績,拖累內房股板塊偏軟。其實阿Man一直強調,要避開財政狀況不穩嘅民企內房,但有中央背景嘅國企或央企,又或者個別財政狀況無問題嘅大型民企,將會係今次內房行業整合,汰弱淘強後嘅贏家,呢啲內房股,可以趁回吐時收集,宜阿Man就一直鍾情碧桂園(02007)。
港股暫時好淡角力,自18200點搵到短期底部後反彈,先後收復10日及20日,而今日早段嘅回吐,亦反映呢兩條平均線暫已找到支持,料稍作整固後,仍有條件向上挑戰50日線,即約23000水平,不過港股要向上挑戰,仍需要成交配合,但暫時未見有資金大量流入港股,加上臨近期指結算,估計呢幾日港股將會傾向窄幅上落,進入好淡爭持局面。
麥狄文
(徐狄怡‧證監會持牌人)