熱門:

2022年3月21日 即巿股評 港股直擊

【盤房來料】觸底反彈後先整固再儲力

市場憧憬俄烏戰事緩和,加上國家主席習近平應約與美國總統拜登視像通話,拜登重申美國不尋求與中國打新冷戰,中概股做好,美股上周五三大指數高收,港股喺周五夜期跟ADR已重上22000大關,成功收復20日線(21559)。不過港股上周落到18200水平作出復仇性反彈後,全周倒升800點,今早高開低走,急升後有回吐亦屬正常。

恒指高開410點,報21823,已見半日高位,之後掉頭向下,曾倒跌79點見21333半日低,20日線得而復失。恒指半日跌18點報21394;國指跌28點或報7338;恒科指幾乎持平,報4485。

藍籌股個別發展,ATMXJ各走各路,阿里(09988)小米(01810)半日逆市升,但騰訊(00700)跌1%,美團(03690)跟京東(09618)半日跌逾4%。友邦(01299)半日升1.6%,但大笨象(00005)有啲腳軟,內險跟內銀股半日亦走軟。油價反彈,亞洲時段升近3%,中海油(00883)半日升2.2%。海底撈(06862)半日跌近7%,藍籌之中排第尾。

恒大系開市前停牌,市場揣測其債務問題再陷爆煲邊沿,拖累內房股跟物管股走弱,整個板塊下跌,跌幅由3%至8%不等。內房股雖然今日受恒大停牌拖累,不過中線嚟講,財務實力較佳嘅如碧桂園(02007)已可以收集,不妨吼位喺4.8至5.2之間收集,呢隻阿Man較有信心,中線要重上7元水平唔太難。

燃氣股今日有資金追捧,新奧能源(02688)去年多賺23.5%,半日急升16.4%,係表現最好藍籌。華潤燃氣(01193)獲大行唱好,半日升一成;昆侖能源(00135)升6.3%;天倫燃氣(01600)升4%。不過睇返幾隻燃氣股嘅圖表,都見到上面出咗枝避雷針,上影線太長唔靚仔,高開低走,反映有沽盤趁急彈走人。

今日疫情記招行政長官表示,4月1月起取消9個國家禁飛令,而所有抵港人士唔再劃分日ABC區,國泰(00293)一度升至52周高位,但半日升幅由近5%縮水至不足1%,好明顯呢啲位有回吐壓力。此外,記招指下月21日開放分段階放寛社交距離措施,包括開放晚市堂食及受限處所陸續可復業,本地餐飲股大家樂(00341)升6.2%;大快活(00052)升3.5%。

其實阿Man都幾肯定,上周二嘅18200已成為短期底部,喺呢個政策底見阿爺出招,國家隊亦入場掃貨,但由18200反彈今朝高位21800水平,以夜期高位22000水平計算,指數反彈咗由24800-25000水平,跌至18200點跌浪6000點嘅反彈黃金比例0.618,嚟到22000水平要回調整固亦好正常,預期呢幾日大市可能喺20500至22000之間進行整固,但阿Man對後市稍為樂觀,經一輪整固再發力上23000至25000仍有可能。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads