老老實實，出淡倉都唔知出咗幾耐，雖然未至於麻木(跌市有贏又點會麻木)，不過開始無初初出淡倉時嗰種「衝呀！殺呀！」嘅氣焰，反而依家係見好即市，怕個市失心瘋突然中段拗腰嚟個大奇蹟日，咁就GG啦。所以噚日偷位出咗隻恒指熊(57605)，一個上半場平均賺幅執到13.87%之後(再次多謝林鄭，不過今日星期二，你出嚟係因為行會，而唔係記者會，唔知work唔work呢)，下半場無都再追落去。心係諗住見19500點，唔知邊個聽到我心聲，就噚日下半場一下子再質落去，噚日下午3點30分，作戰室為19500至19599點嘅牛證默哀一分鐘(都唔知有無)。
愈是要捉反彈，愈是會令牛證變得重貨，愈是會令到指數向下殺牛證嘅慾望、衝動增加，但係咁向下殺都真係唔係辦法，殺到無人再敢買牛就麻煩，所以去到依家呢位，即使再出淡倉都要步步為營，超市都要加咗價先至擺到個減價牌出嚟啦，係咪？！
不過，依家9點11分，同作戰室嘅戰友睇完今朝嘅恒指牛熊證，正如噚晚喺電台節目所料，重貨區已經下移到19000至19099點，呢度有相當於1021張期指，而牛證貼價第二層19300至19399點，就變咗做最多新增街貨層，都有逾800幾張期指。熊證方面 ，20300至20399點為最貼價層，但都係得300幾張期指街貨，似乎大家捉反彈嘅信心仍然存在。
可惜呀，愈捉愈要跌，基本原因之前都講過幾次(基本上依家技術分析只能睇到即市，去到小日線圖開始已經量度唔到，再係咁落去連小時圖都量度唔到)。仲有2分鐘完U，騰訊(00700)喺U盤時咁啱見到佢跌逾14%，我都忍唔住嘩咗一聲，當然，最後騰訊都仲尚算叫做咬得住喺300蚊樓上開市，不過恒指再跌600點，開市報18931點，一口氣殺落19000點以下，Feel到佢有啲殺到痛快嘅感覺，Anyway，我哋做輪證Trading嘅，唔理升又好，跌又好，總之有明確方向就得架啦，雖然隨時出淡倉追指數向下，收返嚟嗰條數都只係補到正股倉少少，但總好過零對沖之下硬輸比個市。
依家9點50分，睇返今朝啲Whatsapp，原來有舊同事快測陽性，大家喺個Group度都已經唔再講「Take Care」、「Get well soon」呢啲「廢話」，而係Share啲方法點上報、去邊度睇醫生、有咩民間偏方等等。
嚟到10點6分，恒指跌幅比今朝開市都跌咗多少少，暫時最低見過18597點，叫做踩過落去18500至18599點嘅目標位，指數一口氣再向下殺咗九層牛證街貨。噚日都有講過，喺日線圖上見Slow STC(14,3)兩條線鬼鬼鼠鼠咁向上翹高咗少少，果然加價係為咗減價，彈高係為咗今日大插。
再過幾分鐘，正當同公司戰友阿Jack分享緊阿里(09988)得7X蚊，PE(市盈率)真迫內銀之時，諗住睇下騰訊(00700)穿300蚊未，不過又見佢股價上返320蚊樓上，再望望個市，跌幅縮到跌400幾點，五分鐘圖上見指數出現一支「大陽燭」推返指數上去，喺作戰室有畫過條頸線，話穿咗先至出淡倉再追，好彩佢無穿；Whatsapp傳來message話開啟咗人道通道，哦，怪不得忽然夾返300幾點上去啦。
「咁樣咪即係打完仗？即係可以出好倉啦？」開人道通道比平民走又唔等於打完仗；再者，香港未封深圳先封，仲有3000幾人確診，其實影響市場嘅壞消息仲未退去，一條「下降通道」都唔會純陰燭組合而成，今日會唔會係「下降通道」裡面嘅一粒陽燭？
指數咁樣向下插落去，真係「隊穿牆式」吐血，不過，以目前牛熊證街貨擺位，目前最多都可能係嘔完第一Round血，但唔等於可以即時輸血。最衰今日係開行會唔係記者會，咁今日大家都不如休息一陣先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
