噚日繼續揸住隻恒指牛(55693)，重新揀過落場位，以五分鐘圖Slow STC(14,3)落到超賣水平就出動，大前題係要保歷加通道口唔好拓闊。以噚日【下半Part】出文時間1點26分計，其實五分鐘圖上嘅Slow STC(14,3)一早已經喺1點20分落到超賣至嚴重超賣水平，以出文後睇完，當你再追返個市，喺1點40分至1點50分捉住Slow STC(14,3)超賣嘅尾巴落場，按當時(55693)高低位做過0.025元/0.016元計，平均買入價為0.0205元。
做得即日Swing Trade，就梗係等返Slow STC(14,3)喺五分鐘圖上由超賣Swing返上超買啦，之後條Slow STC(14,3)都生生性性，真係確認得到行Swing Trade。去到臨收市前20分鐘，Slow STC(14,3)仲上返去90以上嘅嚴重超買範圍，唔過夜完成DT的話，由3點40分至完場前走隻(55693)，以當時高低位0.033元/0.024元計，平均沽貨價為0.0285元，「吓？一個下晝就有39%賺幅？」呢鋪真係富貴險中求，事關隻(55693)都真係幾狼死，事關佢收回價係20678點，而噚日個低位係20709點，講緊只係31點就打靶(◔ д◔)，All or nothing。
正當大家都以為指數第一Round跌定咗，大回小漲即將出現嘅時侯，噚晚美國證券交易委員公布五間中概股公司名單，須提出證據免被除牌，有理無理，中概股全線兄弟齊上齊落，今朝齊齊推低恒指460點嚟開市，開報20460點。開市後更一度跌逾600點，截至依家9點50分止，恒指暫時最低見過20197點，恒指牛證首五層街貨全數被收回，呢度有相當於1064張期指。個零鐘之後又到「11點林鄭」時間，大家又會唔會齊齊出淡倉，再次劍指20000點？
睇埋日線圖，恒指最近期一次創新嘅日子只係兩日前嘅3月9日(星期三)，當時低位為20102點，而同日Slow STC(14,3)兩線落到個位數嘅嚴重超賣水平。今日，依家9點55分，恒指最低暫先20197點，同上一個低位爭95點，而Slow STC(14,3)目前仲有條%K線未見個位數。假設指數同Slow STC(14,3)繼續再落(可能11點開始再落？(ㅅ˘ㅂ˘))都真係有機會再次落到20100點嘅邊皮位，甚至穿埋向20000點出發。
恒指熊(56879)，收回價20766點，今日新上市(所以無街貨)，同現價有逾430點差距適合DT(今日星期五，過夜要過weekend)，市場上最高槓桿嘅一隻熊仔(仲有另一隻都係同一收回價、同一槓桿，所有條款都一樣，喺咁嘅情況之下，純綷揀一個自己喜歡嘅發行商就算啦)。
依家10點8分，見到指數跌幅再次擴大返跌逾600點，五分鐘圖上整條保歷加通道有開始向下運行嘅情況，50分鐘線(五分鐘圖10線)都同指數開始接近，如果指數受制於50分鐘線的話，(56879)出動啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
