雖然隔晚美股收市跌幅收窄，但美國美國證交會(SEC)羅列5間中概公司，須提交證據才免被除牌消息影響，令中概股隔晚喺美股跌到一仆一碌，剛派成績表嘅京東(09618)盈轉虧，裂口低開逾一成，狀況慘不忍睹，拖累恒科指一度大跌近9%，再創成立後新低。
恒指裂口低開430點，其後跌勢加劇，一度跌穿20100，上半場一度跌811點，二萬大關岌岌可危，低見20079，再創2016年6月28日以嚟低位。中午恒指報收20222，跌幅收窄至667點；國指報收6914，跌341點；恒科指報4101，跌335點，跌幅超過7%。半日成交額接近1000億元，周末前夕嚟講唔算少。
藍籌股幾乎全軍覆沒，大笨象(00005)跌1.7%；港交所(00388)一度跌至接近320水平，但即反彈重上330水平，半日跌0.1%，算係幾硬淨。藥明生物(02269)半日跌半成，再創52周低，舜宇(02382)北水沽盤源源不絕，持續錄得北水淨沽出，半日跌近一成，但都未有資格成為幅最大藍籌股。友邦(01299)公布去年多賺28.5%，股價半日升1.8%，表現唔差，公司已表示未來三年將斥資100億美元進行回購，對股價帶嚟一定支持。港鐵(00066)雖有大量員工確診，但公司表示盡量維持正常服務，股價半日逆市升1.4%。
受美國證交會推新規影響，被納入名單嘅百濟神州(06160)、百勝中國(09987)、黃醫藥(00013)跟再鼎醫藥(09688)半日分別大跌8.3%、12.2%、15%及13.2%。喺美國上市嘅中概股隔晚已遭血洗，今日喺香港上市嘅中概股邊有得避，京東業績強差人意，預期大行將陸續調低其目標價，今日由大和率先行動，股價半日大跌一成半，成為表現最差藍籌股。其他喺美國上市嘅中概股無一倖免，閒閒地跌半成以上，當中表現最差嘅恒科指成份股萬國數據(09698)，半日急跌17%。上市翌日嘅蔚來(09866)，跟其他喺港美兩地上市嘅電動車股，分別跌5%至11%不等。阿里(09988)失去紅底股後一直未好過，半日再創香港上市新低，90大關失守，半日再跌6.6%。其他中資科技股幾乎無一倖免，騰訊(00700)半日跌半成，美團(03690)半日跌一成，小米(01810)跌2.7%，相對嚟講算溫和。
中概股跟科技股血流成河，喺目前慘淡嘅投資氣氛下，即使出現嚴重超賣都只有死貓彈，個市一日未跌定，暫時都係坐埋一邊食花生算，仲未係入場撈貨嘅時候。
麥狄文
(徐狄怡‧證監會持牌人)
