噚日出咗單新聞，話唱高散貨所以拉咗10個人，當中包括「幟哥」黃永幟，而發布會話涉及三間上市公司，有得幟哥份嘅咁佢創辦嗰間龍皇集團(08493)實中啦，其餘嗰兩間噚晚喺FB都見有人估咗出嚟，啱唔啱我當然唔知；不過行內比較關心嘅係被捕嗰10個人當中，有指有人報稱係財經分析員，呢單嘢真係買包大花生慢慢食住嘆嚟睇。
睇返個市，噚日恒指低開再低走多少少之後，喺上半場見過低位23155點之後回升。終於喺噚日大約3點5分打後，見到恒指五分鐘圖上嘅Slow STC(14,3)上到超買至嚴重超買水平，恒指Put(29049)終於有位落場，而入市位仲有成個鐘頭時間，因為由3點5分至收市前，Slow STC(14,3)都見喺超買至嚴重超買水平，以當時(29049)高低位做過0.136元/0.128元計，平均買入價為0.132元。還好噚日恒指完U之後指數升幅收窄返，出咗淡倉過夜嘅都真係可以安心瞓覺。
今日本來要去醫院抽血，但由於醫生調咗我覆診時間(可以唔駛咁密去見佢)，原來我家老爺今日攞咗假，諗住陪我返醫院，結果變成我喺度做嘢，佢就睇電視睇肥貓。喺聊天室食咗幾粒「幟哥」花生之後，見到恒指開市微跌11點，但下面堆肥牛真係肥過我家肥貓，無奶油唔向下再碌架。終於到正式開市之後，恒指跌幅擴大至依家9點46分跌121點，做緊23354點。而(29049)輪價做緊0.136元，對比噚日嘅平均買入價暫時多四格咁大把。
依家10點2分，見到恒指都係做緊120零點跌幅，不過喺五分鐘圖上見到Slow STC(14,3)兩線其實都落到嚴重超賣水平，本來都諗住收工，但貪心鬼又喺心裡面走出嚟，事關喺五分鐘圖上見到保歷加通道底線有向下嘅情況(都係有原因所以先貪心架)。
咁啦，以恒指五分鐘圖嘅250分鐘線(五分鐘圖50線)為(29049)嘅止蝕位啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/聊天室？Click呢度就得：https://www.patreon.com/cbbcwar
FB：https://www.facebook.com/cbbcwar
