噚日揀咗隻恒指Put(27415)，打算吼五分鐘圖Slow STC(14,3)上返去超買位時落場。朝早無位唯有再等埋個下晝，喺噚日下晝1點40分同埋3點30分呢兩段時間，Slow STC(14,3)的確有向上衝過，但都只係衝高到接近超買範圍，連兩條線同時進入超買範圍都係未見過，(27415)只能夠埋藏喺心底裡。
噚日傍晚收到一個好消息，就係繼新場戰友添丁後，舊場聊天室嘅其中一位戰友再添丁做爸爸，開心share剛剛出世嘅BB相比我哋一班舊底聊天室戰友睇，真心好耐都未見過咁細個嘅BB，辛苦太太之餘，小朋友，歡迎你嚟到呢個世界。
依家9點18分，我家嘅「小朋友」3歲肥貓喺個廳度來來回回咁奔走；睇住佢追住啲公仔跑咗一陣之後，恒指完U開市，微升22點，報23658點。由於開市點數唔大，所以噚日延伸至今嗰條窄窄嘅保歷加通道仍然健在。去到9點53分，指數先跌後再升，喺五分鐘圖上見到開市後首10分鐘指數都出現兩支比較大嘅燭頂住整條保歷加通道，開市時如果心急入市真係會好易被佢Fake到，所以轉去小時圖睇，諗住用個遠少少嘅時間圖做部署可以腦輕鬆。
喺小時圖上見到Slow STC(14,3)行完超賣再超賣之後，今日%K線終於上破%D線，出到觸底回升，不過，呢啲位出好倉都只係能夠先以10小時線(小時圖10線，9點57分@23772點)去追上一趟，事關呢個位同五分鐘圖嘅500分鐘線(五分鐘圖100線，9點57分@23776點)好鬼近，大家都係mark住237xx點呢個位。
Day Trade好淡倉反來反出咁樣出正常不過，呢啲都係swing trade嘅其中一種做法。如果中線少少就可以望返個日線圖，見指數今日雖然係上行但技術上都係處於各主要平均線以下，若然稍後喺五分鐘圖見Slow STC(14,3)上到超買的話，噚日揀隻(27415)仲可唔可以落場？
喺同一 行使價之中，有另一隻Put今日見引伸比(27415)為低，槓桿比(27415)為高，就係(25566)，行使價同樣係23000點，10.96倍槓桿其實隨時Day Trade都夠用。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
