經過兩位專科醫生嘅治療，再加上我家老爺同肥貓(?)嘅照顧，受到甲亢藥物敏感影響嘅情況終於都穩定落嚟，再次多謝大家關心同擔心。
不過，大家可能比較關心嘅係恒指，事關今朝早甫開市又無咗300幾點，指數由原先近熊證街貨變成近牛證街貨，而且以開市價23420點計，仲爭廿點就可以全殺第一層牛證街貨。留意返喺23100至23199點呢層開始向下數四層至22800至22899點，每層都有過千張期指街貨坐鎮，指數會唔會一下子向下再碌多幾百點向下再殺落去？講緊呢度都成千點咁滯，除非市場忽然有個好不明朗嘅因素出現啦，否則都真係未諗到有咩理由無啦啦喺粉飾窗櫥嘅月份度咁樣急跌；不過，聊天室未正式開市前都叫大家可以準備開淡倉。
嚟到9點41分，指數一度跌穿過23400點，換言之恒指喺開市無耐已經殺咗第一層牛證街貨，呢度有相當於298張期指，其後指數跌幅都有見到收窄，聊天室第一注淡倉就此完畢(Day Trade就係咁快架啦)。
換返個日線圖睇，猶記得上個星期喺日線圖上畫咗個「長方形」出嚟，「長方形」代表待變格局，只不過無諗到呢個「長方形」短得咁緊要，今日下行都算叫做向下破咗「長方形」格局，留意到Slow STC(14,3)兩線向下中，只不過問題在於Slow STC(14,3)兩線本身已經處於20附近嘅超賣位置，喺呢個位嚟再開淡倉，博指數同Slow STC(14,3)繼續向下嚟殺下方肥牛，會唔會有啲進取得滯呢？
恒指Put(26028)，行使價22888點，同現價有約2.5%價外，出年3月底到期，低引伸、高槓桿、低街貨，吼返恒指五分鐘圖見Slow STC(14,3)上到超買位時先至落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
