美股強勢無視變種病毒Omicron確診個案增加，加上眾議院已通過將債務上限延至明年2月18日，為美股沖喜，三大指數急彈，不過市場關注中概股退市風險，相關股份跌勢較顯著，今日喺港股呢邊當然齊齊過堂。港股彈咗兩日，不過都係彈得313點，彈力一般，今早又因為中概股反覆受壓，當中阿里巴巴(09988)跌逾4%，再創上市新低。而今日收市後將染藍嘅京東(09618)嘅網易(09999)分別跌咗6.9%及7.5%，唔通重磅股真係一染藍就難逃下跌嘅宿命。
恒指低開113點，受多隻中概科網股急跌下，拖累港股最多跌337點，低見23451，不過23500似乎真係搵到個支持，大市跌幅收窄。中午恒指跌176點，報23612；國企指數報8404，跌101點；恒科指跌139點，報5878點。
美國證交會(SEC)要求在美上市嘅中國企業，必須公開其是否受國家控制或擁有的企業，並提供審計證明資料，若然唔符合審計要求，就會被退市。市場擔心美國上市嘅中概股有退市風險都正常，咁若然要退市返嚟港股呢邊上市，咁當然就唔可以好似喺美股咁享有較高估值，咁股價自然亦要插水。至於之前先斬後奏喺美國上咗市嘅滴滴出行，就準備舉手投降，即日起啟動喺紐交所退市工作，並啟動嚟香港呢邊上市嘅準備工作。
藍籌股個別發展，以為大笨象(00005)畀歐盟罰佢十幾億港元，股價會受壓，相反今日竟然逆市升2%，算係幫手拉動大幅跌幅收窄嘅功臣。至於其他內銀股都逆市做好，睇嚟息口趨升嘅個概念，已開始植入咗缸邊友個腦裡面。比亞迪(01211)傳獲豐田小型電動車訂單，股價半日反而跌3.7%，呢個可能係入場好機會，阿Man認為呢啲位上車，用290元止蝕，博個市守到23500下星期有得彈，比亞迪自然可以輕易上返300蚊樓上。
科網股普遍受壓，主要受中概股退市風險所拖累，不過本身未有喺美國上市嘅科網股都插埋一份，似乎有少少借啲矣。有貨又唔使太擔心，本身科網股都差咗咁耐，今日再見到咁嘅場面，唔會覺得驚嚇亦唔覺得意外。
內地加快建設全國統一電力市場，中資電力股近期持續跑贏大市，就連死蛇爛鱔咗一排嘅龍源電力(00916)都升返3%過外，即管睇下呢轉上唔上得17元企穩，企得穩咁就可以扭轉弱勢，再展升浪，企咗17元下個目標當然係18。其他電力股都有理想表現，折讓配股嘅中國電力(02380)噚日插水12%後，今日反彈返一成，市場似乎仍未停止對電力股作資金配置。其他電力股升幅由起過3%至7%不等。
麥狄文
(徐狄怡‧證監會持牌人)
