噚晚再度入急症,藥物敏感起到全身風癩實在痕癢難耐,今日火速被醫院掉去入內科,先睇睇係唔係真係因為甲亢藥而令到我全身起疹。
噚日個市實在難玩,不過,見噚晚美股發圍升逾600點,從牛熊證街貨圖上見到以噚日恒指收市價計,指數由原本近牛證街貨慢慢變成近熊證街貨,一來新場上多返啲新嘅熊證上,今日所見恒指熊證最貼價都落返去23800至23899點,令牛熊證街貨差距收窄返,唔係好似之前咁一味出淡倉殺指數向下殺重牛,二來恒指由11日16高位25746點下跌至11月30日低位23175點,半個月內累跌2571點,12月為傳統粉飾櫥窗嘅月份,那怕係技術反彈又好,趁年尾做返好少少都好,怕且呢個月都真係唔好睇得咁淡。
個股方面,望望月曆今日星期五,下個星期一(12月6日)就係之前季檢完嘅恒指成份股正式加入指數嘅日子,睇返今次季檢有潤啤(00291)﹑新奧能源(02688)﹑京東(09618)同及網易(09999)成功染藍,即係話如果指數基金要追貨嘅話,今日係最後機會,可以留意一下。
恒指完U,開市報23675點,跌113點,喺五分鐘圖上見指數向下跌至保歷加通道底線附近,Slow STC(14,3)由本來近中軸至超買水平,兩線呈上嘅,都變咗落返少少去到中軸位,兩線呈下。
另外,由小時圖所見指數噚日幾經辛苦上返去保歷加通道中軸之上,但可惜今日低開,指數再次跌返落保歷加下降通道,更重要嘅係Slow STC(14,3)喺超買水平見%K線高位跌穿%D線,唔通今日都要繼續開淡倉?又係嘅,牛證再儲返幾層過千張期指街貨喺度,但最近都要去到23100至23199點,唔會咁狼死掛。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。