隔晚美股三大指數再創新高，以為港股連跌六個交易日後有得跟彈就大錯特錯，港股今日仍然反覆低走，除咗係因為包括歐盟、英國和加拿大等32個國家，將取消給予中國「普惠制」的貿易優惠待遇之外，仲有市場觀望今明兩晚聯儲局議息，加上A股又腳軟，港股連續第七日下跌。
恒指低開38點，早段反覆，一度倒升87點，見25187點半日高位，其後再現沽壓，失守兩萬五，半日最多跌291點，見24808點，創10月8日以來低位。恒指中午報24857點，跌242點；國企指數報8798點，跌64點；恒科指跑輸，半日跌84點，報收6229點。半日成交額只有678億元，實際沽壓唔算好大。
藍籌股個別發展，友邦(01299)跌勢較為顯著，半日跌2.8%；大笨象(00005)半日跌近1%，港交所(00388)半日跌逾1%。ATMX全線下跌，算係最強勢嘅美團(03690)跌得較少，半日跌不足0.1%；騰訊(00700)半日跌0.6%，阿里(09988)半日跌1.8%，反而對手京東(09618)半日只係跌0.2%。ATMX之中，小米(01810)跌3.3%，走勢較弱，依家睇住20元呢個大位守唔守得到，暫時無乜可以做。
光伏股今日有負面消息，彭博引述投行Roth Capital報告指，內地太陽能龍頭企業隆基(601012.SH)，其產品將被美國海關和邊境保護局扣留，市場擔心其他光伏股產品亦有可能被美國扣留，整個板塊顯著下跌，以信義光能(00968)半日跌8.5%表現最差，亦係跌幅最大藍籌股。同系信義能源(03868)亦跌8%，其他光伏股跌幅由超過3%至近半成不等。
阿爺有心要遏止煤價狂升，內地動力煤價連跌十日，今日卒之有得彈，帶動煤炭股逆市向上，以兗煤(01171)半日升7.8%最勁，其他煤炭股亦普遍錄得2%以上升幅。另一個弱勢反彈板塊係內房股，恒大(03333)表示今年7至10月完成546個批次交樓工作，涉及184個項目，內房股乘機反彈。不過最叻都係彈咗4.6%嘅富力地產(02777)，其他內房股普遍反彈唔夠1%，彈力麻麻。
噚日上市嘅微創機器人(02252)，噚日低開高走，今日再下一城，半日逆市升逾3%，現價較招股價升一成。資金流入炒半新股同新股，帶動上市一個月左右嘅譚仔(02217)落鑊，半日升逾一成，現價離招股價3.33元僅一步之距，或有機重上水面。
麥狄文
(徐狄怡‧證監會持牌人)
