美股上周五腳軟，三大指數最多都無跌多過1%，但港股今日就跌到反艇，A股今日開始放假，北水繼續暫停至本周四，少咗一重水源，港股未能止瀉，恒指更一度跌逾千點。恒指低開280點，報24640點已經係半日高位，盤中一度跌1048點，低見23781點，創自去年10月6日以嚟新低。恒指中午報收23955點，跌965點；國指半日跌377點，報收8563點；恒科指跌245點，報收6207點。
藍籌股全部插水，有傳阿爺約見本地地主佬，要求佢哋幫手解決房屋問題，加上共富理念下，令人聯想到本地地產股昔日暴利年代將終結，而曾被稱為地產霸樣嘅地產股，霸氣不再，今日所有本地地產股捱沽，恒地(00012)跌12.4%，為半日最大跌幅藍籌；其他三大地主，長實(01113)跌7.9%；新地(00016)跌9.1%；新世界(00017)跌11.4%。
內房股及物管股未能止瀉，恒大(03333)債務問題乃未能解決，英國《金融時報》引述兩名恒大高層報道指出，集團業務最終可能被地方政府及大型國企發展商按地區接管，不過呢個會係最後一個辦法。恒大低處未算低，半日再跌近17%。恒大系其他股份亦繼續插水，恒大汽車(00708)跌7.7%；恒大物業(06666)跌12.6%；恒騰(00136)跌12.1%。恒大完蛋幾乎已無懸念，主要股東華置(00127)跌一成。其他內房股跟物管股閒閒地跌一成以上，上星期阿Man已講咗喺恒大問題未解決前，即使內房股跟物管股估值再平，暫時都係避之則吉。
恒大事件唔單止拖累整個內房股板塊跌到一仆一碌，就連內銀股亦拖累，恒大部份主要來往銀行已為恒大相關貸款計損失準備；以審慎應對恒大嘅地產貸款；而部份銀行則計劃展延短期貸款。內銀股幾乎無一倖免，跌幅由3.7%至接近一成不等。而有份投資恒大債券嘅平保(02318)，有報道指就高危房企股債零敞口，不過今早仍跌至超過四年低位，半日跌7.5%。
恒指已跌破前底，關鍵係睇24000點能否守得住，否則大市有機會落到23300點先識得停。不過大市喺短短幾日已跌逾2000點，喺鐘擺效應下，點都會彈一彈，不過由於缺乏北水支撐，估計暫時反彈力度唔會太大，目前重點都係要先守住二萬四關。喺咁嘅情況下， 乜都唔好做，未宜撈貨，保持足夠防守力，待大市跌定再作定奪。
麥狄文
(徐狄怡‧證監會持牌人)
