隔晚美股腳軟,愈來愈多金融機構、評級機構開始提出減持美股,同美股風險正上升嘅言論,令投資者開始變得審慎。而港股則再受監管風暴影響,中宣部跟新聞出版署強調要加強遊戲直播管理等,仲約見個別相關公司傾偈,令市場對科網股監管憂慮再升溫,港股半日插水逾400點,再度失守二萬六。
恒指低開244點後,跌幅曾略為收窄至195點,見26125點半日高位,但又見沽盤湧現,半日最多跌459點,見25861點半日低位,有機會今日低處未算低。中午恒指報收25898點,跌422點;國指報收9263點,跌185點;恒科指跌得最狠,半日唔見超過3%,報收6650點。
恒大債務問題隨時爆鑊,有傳聞指恒大已暫停向兩間銀行還息,等緊債務重組,其實咁大條數,唔做啲hair cut都好難搞得掂,重點係阿爺對於恒大債務問題未有施以援手,咪咁天真以為恒大屬於大到不能倒嘅民企,講到尾民企只不過係私人企業,唔同央企或國企有阿爺撐腰,今次恒大爆債務問題,阿爺就似擺出一副你死你事嘅態度。大前提係只要恒大嘅債務問題,唔會對金融體系構成系統性風險,咁恒大跟銀行之間能夠私下解決,阿爺都唔會理佢咁多。而內地樓市喺阿爺對市場諸多限制下亦無起色,內地有報道指內房「金九銀十」嘅銷售情況差過預期,內房股跌勢未止。中海外(00688)、潤地(01109)跟龍湖(00960)三隻內房藍籌半日分別跌2%、1.8%及0.7%。
騰訊(00700)跟網易(09999)又畀人叫去照肺,兩股分別跌5.7%及7%,騰訊更成為半日表現最差藍籌股。其他科網股齊齊過堂,跌幅由2%至6%不等。快手(01024)成為北水新貴後,幾日見有北水流入,但100元阻力大,兼且上面蟹貨一籮籮,博反彈到此為止。阿Man唔怕長氣都要再講多次,科網股喺監管陰霾下,只會有波幅,冇升幅,暫時都係玩區間上落,好似騰訊又跌返穿500元,暫時有心想搵位入場,待股價回落至480都未遲。
科網股跟內房股死到直,不過商品股逆市走強,上周阿Man喺其他平台及收費聊天室提及嘅華潤水泥(01313)今日逆市升咗超過2%,表現唔錯,話明呢期要搵啲估值偏低,行業唔受政策風險影響嘅股先夠穩陣,水泥股受惠基建發展提速,估值低迷有一定避險作用。至於煤炭股今日有炒作,主要係內地動力煤價創新高,只不過煤炭股累積升幅唔少,煤炭價上升或已經喺升勢反映,目前再追入風險已高,值博率相對唔吸引。
麥狄文
(徐狄怡‧證監會持牌人)