美國嘅經濟數據反映，喺變種病毒肆虐下無礙經濟復甦，唔少聯儲局官員開始提議早些少收水，有官員都表示可以利用八個月時間去縮減買債，而加息則提前至明年下旬開始。而市場則觀望鮑爺喺Jackson Hole會議講話，會唔會對美國貨幣政策有更清晰路線圖，美股隔晚牛皮偏軟，三大指數下跌。不過港股跟美股愈走愈遠，依家都唔多跟美股行，半日反覆偏好，暫時喺條10日線(約25545)附近爭持。
恒指低開78點報，早段跌幅曾擴至108點，見25307半日低位，不過A股反彈，港股止跌回升，最多曾倒升225點，見25641半日高位，可惜未能企穩十天線。最終恒指半日收報25546點，升130點；國指半日報收9025點，升88點；恒科指升1.1%，報6403。大市半日成交進一步縮水至674.49億元，周末前外缸邊友更加審慎。
藍籌股個別發展，大笨象(00005)跟中移動(00941)少少腳軟，中資金融股普遍向好，友邦(01299)半日亦升1.1%。而瑞聲(02018)噚日急跌後未止瀉，今日再跌1.2%，但40元水平料有支持。至於ATMX都係浮浮沉沉，半日以美團(03690)升愈2%，表現較好。華潤置地(01109)派成績表，中期多賺18%，股價半日升6%，藍籌之中表現最好。
汽車股今日表現不俗，主要係東風(00489)跟小鵬(09868)交出亮麗業績，股價半日分別升一成及2.6%，其他汽車股普遍有2%以上升幅。當然阿Man至愛係比亞迪(01211)，今早特價時段，逼近250元水平低見252元又有值博率，今日收市後出業績，博佢又交到份好好靚靚嘅成績表，下周返嚟再向上試270-280元。
講到汽車股，最唔汽車嘅恒大汽車(00708)半日升逾兩成，有傳聞指小米(01810)願意出價500億元收購，但恒大嫌平得滯唔肯賣。呢個傳聞雙方都未有證實，不過唔係阿Man潑冷水，本身恒大汽車真係得個吹字，連阿爺之前都開到口寸恒大汽車紙上造車，成檔嘢最值錢係美國電動車生產商法拉第未來(Faraday Future)，不過恒汽都只係佔兩成股權，咁恒大汽車市值600億過外，幾多係水份大家心照。若然小米真係肯真金白金拎500億出嚟收購，恒大應該仆到去簽約。依家仲吊高嚟賣，乜嘢葫蘆賣咩藥，係咪想擺個姿態，呢啲只有佢自己至知。總之恒大系嘅債務問題一日未解決，呢系公司都係危危乎，除非嫌錢腥，否則都係咪多手接飛刀。
立即試用EJFQ「信號」全方位股票分析系統，運用100+ 選股條件篩選值博股！
