上周五美股三大指數再創新高，但好似完全唔關港股事咁，尤其內地對不同行業監阜壓力加重，甚至要求股份於美國市場退市，中概股急跌，恒科指創一年新低。恒指裂口低開496點，開市即失二萬七關，雖然跌幅曾略為收窄至443點，見26878點半日高位，但再失26800重要支持後沽壓增加，盤中一度跌857點，見26464點，為去年12月29日新低。中午恒指報收26527點，跌794點；國指跌359點，報收9479點；恒科指重逾半成，點414點，報收6854點。
藍籌只有公用股上升，投資者寧收息唔望資本增值，中電(00002)升1.1%；電能(00006)、長建(01038)和長和(00001)升約1%；港鐵(00066)升0.8%。海底撈(06862)上半年業務表現不達管理層預期，半日股價大插16.6%，暫時咪多手接飛刀。至於藥明生物(02269)半日亦跌8.3%，已失批股價後再向100日線邁進尋找支持。不過都唔係收息股一定逃過一跌，金融股就無咁好彩，內險股平保(02318)更創兩年半低位，半日跌咗4.1%。
科網股繼續頽落去，市場監管總局作出行政處罰決定，責令騰訊(00700)及關聯公司採取30日內解除網上獨家音樂版權等處罰，騰訊(00700)插6.5%。家下啲人係最怕監管機構向騰訊旗下業務逐一開刀，又或者係逐隻平台股開刀，監管風暴愈演愈烈，嚇怕投資者。唔單止外資怕怕，就連北水亦逃亡，西北兩條水夾擊下，大部份平台股重創，閒閒地跌5%以上，網易(09999)跟京東健康(06618)，半日跌超過13%。
除咗科網股，教育股死得更加慘，內地校外培訓行業「雙減」政策(減輕過重作業負擔和校外培訓負擔)上周六(24日)正式生效，除禁止學科類培訓機構上市融資外，已上市的公司也不得通過股票市場融資去投資同業，並禁止外資持有相關機構。呢個政策唔單止係令到教育股無得再發展，簡直係要佢哋做義工咁滯，整個板塊沽壓嚴重，跌兩三四成股份比比皆是。
另一個重挫板塊係物管股，上周住建部等八部門發布有關整頓房地產行業的聲明有關，當中提到將針對物管行業整改「擅自利用業主共有部分開展經營活動及侵佔、挪用業主共有部分經營收益」此部分。根據監管要求，物管公司可以分享最多30%由公共空間產生的收入，包括戶外廣告等項目，但須獲得業主同意，並相信多數物管公司均遵守規則，但亦不能排除部分小型物管公司並有遵守。其實大部份物管股來自公共空間產生只佔一小部分，約2020年其平均總收入嘅2.2%。而今日跌幅最大嘅世茂服務(00873)，半日跌逾兩成。來自公共空間產生嘅收入，更低於2%。可見市場對於阿爺向任何一個板塊推出整改政策已變得心慌，直以可話心淡。
政策市係最難估，尤其阿爺出招又快又狠，仲要專吼周末嚟出消息，殺個人措手不及，今日跌市估計有唔少係孖展斬倉，又或者係要錢唔要貨，心淡斬手指離場，整個氣氛影響下，唔少股份跌過籠。今日一動不如一靜，之前阿Man提咗好多次要輕倉上陣，如果呢個時候仲係重倉，個市咁跌法當然心慌，呢啲情況通常都會做錯決定，所以最好眼看手勿動。
麥狄文
(徐狄怡‧證監會持牌人)
