噚日冷冷地捉咗隻中海油(00883)出牛(69754)出嚟，即日即執5%賺幅；咁快走主要喺因為喺下半場1點30分到見股價再次喺保歷加通道頂向下回至中軸水平，同步擔心中軸頂唔順，一穿嘅話就會好快插到保歷加通道底，於是5%有食唔食，罪大惡極。誰不知股價其後隨指數一齊上行，以噚日(69754)收市價0.082元計，大拿拿執少咗九格，算啦，有邊個未中過「揸住唔升，一放就升」呢款降頭。
今日個天仍然都係好暗，不過就無噚日咁大雨，或者今日天氣叫做好返啲，所以今朝早恒指都可以開升70幾點，至於能唔能夠好似噚晚美股同今朝日經咁強就要稍後先知。
嚟到9點50分，恒指都仲係喺幾十點升幅之間浮沉，拆開五分鐘圖見到指數暫時受制於500分鐘線(五分鐘圖100線)，換上保歷加通道就見到保歷加通道仍然都係咁窄，無計，今朝無大點數高開/低開擘大條保歷加通道，怪不得恒指見悶局。不過，反而比較在意嘅係恒指小時圖見指數上到10小時線(小時圖10線)附近，仲有大約8分鐘小時圖就會出今日第二支燭，到時就有答案。
終於嚟到10點2分，見指數已經由綠轉紅，小時圖亦都出咗第二粒燭，目前情況係見到10小時線似乎做咗暫時恒指阻力，恒指會唔會繼續向下，就真係要問五分鐘圖保歷加通道底線拓唔拓闊啦。
喺未知恒指想點之前，又再向個股發展，喺聊天室上暫時都搵咗三隻個股係有啲潛力做到swing trade，當中比較喜歡嘅係銀娛(00027)。
(好例牌嘅一句)受到疫情影響，澳門賭場人流稀少，以至濠賭業生意下降，濠賭股如同本地零售及餐飲股一樣同樣受壓，喺日線圖上見到銀娛由今年2月高位80.3元向55元方向出發中，Slow STC(14,3)已經進入嚴重超賣範圍，可恨未見%K線低位回升%D線。
喺小時圖上銀娛更加係出現超賣再超賣，兩線於0至2呢個極度超賣嘅水平重疊，完全無力反彈，就算落到去五分鐘圖，今朝股價叫做隨市上行，但嚟到依家10點13分，都見Slow STC(14,3)行緊超賣再超賣，保歷加通道口拓闊似係比位銀娛再落。
其實面對呢啲爆殘股都真係幾興奮(類似屯馬開通咁興奮啦😅)，事關又可以將佢bookmark喺個watch list度，等自己喺指數無方向時，拎返出嚟又望下有無位可以摺得到。
講真，銀娛跌到咁殘，最貼價Call講緊都同現價有約20%價外，不過以Call輪最貼價嗰堆，槓桿平均都有6至7倍計，又同牛證企到50元收回價嘅槓桿差唔多，又少咗一層打把嘅風險，只係擔心個引伸啫，揀隻低啲嘅咪得囉。
銀娛Call(13125)，行使價67.22元，同現價有逾20%價外，相約行使價中屬引伸偏低、槓桿偏高，低街貨嘅產品。策略上，DT嘅當然可以吼五分鐘圖Slow STC(14,3)見低位確認回升進入，想玩耐少少嘅，都係等日線圖Slow STC(14,3)見觸底先啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
