美股上周三大指數下跌，不過唔多明點解，港股跟跌還跟跌，咩事恒指喺上半場一度要跌超過600點，除咗話係借消息嚟割韮菜，阿Man都諗唔到有乜嘢原因。幸好上星期當大市反彈時，阿Man都不斷提醒大家，恒指一日唔重上28200點企穩，都係處於另一個上落空間，仲要係移動區間已下移至27200至28200點，若然個別股份，尤其平台股反彈，好趁機會減磅套現，整頓一下投資組合。
恒指低開218點，開市價27786點已經係半日高位，開市後即跌穿10日線(27731點)，目前除咗一直守住250日線(27160點)之外，其他移動平均線全部失守，半日最多跌607點，見27397點，創7月9日以來新低。恒指中午收報27558點，跌446點；國指報9984點，跌168點；科指跌157點，報7456點。
美債息走低，金融股走軟，大笨象(00005)跌2.2%；友邦(01299)跌3%；中資金融股亦走軟，內銀內險股隨大市下跌。不過中資通訊股則逆市上升，中移動(00941)跟聯通(00762)分別升1.2%及2.9%，連帶設備股中興通訊(00763)半日亦逆市升逾3%，已升破半年高位。
話咗平台股呢期都係係有波幅，冇升幅，今早平台股沽壓沉重，騰訊(00700)跌2.4%，唔知550呢個位有冇足夠支持，若然再失守，呢個位將會變為阻力位。大摩調低美團(03690)目標價，半日跌4.4%，300元可以幾肯定係短期阻力。上海法院發布十宗互網不當競爭企業，百度(09888)榜上有名，股價跌4.1%；快手(01024)主要股東禁售期下月解凍，有傳媒報道有大戶將逾5.6億股實名持股股份，轉由摩根大通持有，市場揣測快手短期內配股，股價低處未算低，話咗落地獄，就算有彈都係死貓彈，多手撈底以為見咗底，當然要付出代價。
新能源股跟醫藥股個別發展，有個別股份見資金流入，阿Man推介過一系列嘅股份，好似生化科技股龍頭藥明生物(02269)跟信達(01801)逆市向上，海吉亞醫療(06078)亦靠穩。暫時都係炒股唔炒市，重磅藍籌之中，暫時未受政策影響，甚至受惠中美角力只有港交所(00388)，今日仍算硬淨，嚟緊吼位520元邊搵位上車。
阿Man一向睇唔起恒大系，即使呢一系股票曾經炒到出煙，阿Man一向對呢一系股份唔止有戒心，而係從不參與。外電引述無錫市中級人民法院裁定書顯示，廣發銀行請求凍結被申請人宜興市恒譽置業有限公司、恒大地產集團有限公司銀行存款1.32億元人民幣或查封、扣押其他等值財產。恒大系債價本來已不濟，今日股債齊齊急跌，恒大(03333)插7.1%；恒大汽車(00708)挫6.9%；恒大物業(06666)挫6.2%；恒騰網絡(00136)挫9.4%。都係嗰句，呢一系股份長期受債務問題所困擾，完全係避之則吉。
麥狄文
(徐狄怡‧證監會持牌人)
