美股個別發展，隔晚道指跟標指上升，納指則回軟。港股連跌兩日失近千點後回穩，雖然恒指重上28400水平，但仍受制50日線(28564)，缺乏北水下，大市唔單止無升幅，更無乜波幅，成交亦欠奉。恒指高開80點，其後倒跌36點，見28321點半日低位，但買盤在低位支持，大市止跌回升，最多升129點，見28487點半日高位，但受制100天線，臨近午市升幅收窄，最終恒指半日收報28428，升71點；國指收造10723，升10點或；恒生科指中午升32點，報8259。半日成交奀奀豬只有480億左右。
噚日兩隻跌到一仆一碌嘅重磅金融股大笨象(00005)跟友邦(01299)，半日反彈0.6%及1.4%，邊個彈力勁啲，一目了然。雖然成交縮到咁款，但港交所(00388)仍彈1.3%，唔知以為成交額半日過千億。幾隻重磅科技股表現呆滯，連波幅都唔夠炒即市，缸邊友搵食艱難。平保(02318)要硬食方正，市場梗係唔睇好，股價弱勢持續，繼續向下尋底，半日再跌近2%。
美滙指數再轉弱，商品期貨價格做好，推動資源股向上，其中石油股及金屬股有資金追捧，鋼鐵股亦回升勢，之前阿Man推介過嘅馬鋼(00323)半日升2.6%，鞍鋼(00347)獲大行上調目標價，半日升4.8%，但都唔夠重鋼(01053)半日升近7%咁勁。之前阿Man有提到要趁回吐吸納相關股份，下半年組合內需要配置資源股。除咗資源股，阿Man亦表示可以吼回吐吸納航運股，今日呢個板塊繼續向上，皆因市場相信運費繼續漲價。
阿里巴巴旗下「天貓香港」正式上線試業，主打本地服務及產品，所有商品均由本地商家發貨。本來本地網購市場市佔率最高嘅香港電視(01137)半日跌6%，此前其股價己持續向下尋底，主要係後疫情民眾漸回復正常生活，網購活動較之前減少，港視炒得最興奮時間過晒，今日大成交下破250日線，後市走勢凶多吉少。
暫時港股無特別方向，移動區間由28500至29500下移至28000至29000水平，關鍵係恒指能否盡快收復50日線，若然仍喺多條移動線下徘徊，只怕久守必失，尤其喺成交薄弱嘅情況下，要推冧港股下探二萬八支持實在容易。
麥狄文
(徐狄怡‧證監會持牌人)
